ಗಜಲ್

ರತ್ನರಾಯಮಲ್ಲ

ಹೆಂಗಸರು ಗಂಡಿಗೆ ಜನುಮ ನೀಡಿದರು ಗಂಡಸರು ಬಜಾರಿನಲ್ಲಿಟ್ಟರು ಅವಳನ್ನು
ಮನ ಬಂದಾಗ ಅಪ್ಪಿ ಮುದ್ದಿಸಿದರು ಸಾಕೆನಿಸಿದಾಗ ತಿರಸ್ಕರಿಸಿದರು ಅವಳನ್ನು

ಎಲ್ಲಿಯೋ ಖರಿದಿಸಿ ಇನ್ನೆಲ್ಲಿಯೋ ಮಾರುವರು ಮೂಕ ಹಸುವಿನಂತೆ ಅವಳನ್ನು
ಭೋಗದ ಬಿಸಿ ಅಂಗಳದಲ್ಲಿ ಇಂಚಿಂಚು ಬೆತ್ತಲಾಗಿಸಿ ಕುಣಿಸುವರು ಅವಳನ್ನು

ಇಜ್ಜತ್ ಬೇಯಿಜ್ಜತ್ ಮನಸುಗಳಲ್ಲಿ ತಬ್ಬಲಿಯಾಗಿ ನರಳುತಿದೆ ಹಗಲಿರುಳು
ಪುರುಷ ಸಿಂಹಗಳು ಅನುದಿನವೂ ದಬ್ಬಾಳಿಕೆಯಲ್ಲಿ ಅಳುಸುವರು ಅವಳನ್ನು

ಪುರುಷರಿಗೆ ಎಲ್ಲದರಲೂ ಹಕ್ಕಿದೆ ಮಹಿಳೆಯರಿಗೆ ಬಾಳುವುದೂ ಶಿಕ್ಷೆಯಾಗಿದೆ
ಹಾಲು ಕುಡಿದ ಎದೆಗಳನು ಮರೆತು ರಕುತದಲ್ಲಿ ಮುಳುಗಿಸುವರು ಅವಳನ್ನು

ನಮ್ಮ ದೇಹವ ರೂಪಿಸಿದ ಗರ್ಭಗಳನು ವ್ಯಾಪಾರ ಮಾಡುತಿರುವರು ‘ಮಲ್ಲಿ’
ಹಸಿ ಮಾಂಸದ ರುಚಿಗಾಗಿ ಪಾಪದ ಕೂಪದಲ್ಲಿ ನೂಕುತಿರುವರು ಅವಳನ್ನು

*********************

About The Author

admin

See author's posts