ಗಜಲ್
ರತ್ನರಾಯಮಲ್ಲ
ಭಾರವಾದ ಬಳೆಗಳನ್ನು ತೊಡಿಸದಿರಿ ನನ್ನವಳ ಸುಕೋಮಲ ಕೈಗಳಿಗೆ
ಕಲಬೆರಕೆಯ ಲೇಪನ ಬಳಿಯದಿರಿ ನನ್ನವಳ ನಾಜೂಕಿನ ಅಧರಗಳಿಗೆ
ಹೇಮಾಭರಣಗಳ ಹೊಳಪಿಗಾಗಿ ಕುಲುಮೆಯಲ್ಲಿ ಮುಳುಗಿದೆ ಜಗತ್ತು
ಬಣ್ಣ-ಬಣ್ಣದ ಲೋಹಗಳಿಂದ ಬಂಧಿಸದಿರಿ ನನ್ನವಳ ಮೆದು ಅಂಗಗಳಿಗೆ
ಗೋಸುಂಬೆಯೂ ಒದ್ದಾಡುತಿದೆ ತನ್ನ ಇರುವಿಕೆಗಾಗಿ ಈ ದುನಿಯಾದಲ್ಲಿ
ಯಾವ ಯಾವದೊ ರಂಗನ್ನು ಹಚ್ಚದಿರಿ ನನ್ನವಳ ತುಂಬಿದ ಕೆನ್ನೆಗಳಿಗೆ
ಕಂಗಳಲಿ ಕಂಗಳಿಟ್ಟು ನರಮನುಷ್ಯರ ಜಮಾನವನ್ನು ಮರೆಯಬೇಕಿದೆ
ಸುರಮಾ ಬಳಸಿ ಅಣೆಕಟ್ಟನ್ನು ಕಟ್ಟದಿರಿ ನನ್ನವಳ ಜಿಂಕೆ ನಯನಗಳಿಗೆ
“ಮಲ್ಲಿ”ಯ ಮನವ ಗೆದ್ದಿರುವವಳು ನನ್ನುಸಿರು ನಿರಾಭರಣ ನೀರೆ ಸಾಕಿ
ಕಾವಲಾಗಿ ಮುಳ್ಳಿನ ಬೇಲಿ ಹಾಕದಿರಿ ನನ್ನವಳ ಪುಟ್ಟ ಪುಟ್ಟ ಹೆಜ್ಜೆಗಳಿಗೆ
***
About The Author
ಡಾ.ಮಲ್ಲಿನಾಥ ತಳವಾರ ಸರ್ ಗಜಲ್ ತುಂಬಾ ಸೊಗಸಾಗಿದೆ
ತುಂಬು ಹೃದಯದ ಧನ್ಯವಾದಗಳು ಸರ್ ಜೀ