ಗಜ಼ಲ್

ಎ . ಹೇಮಗಂಗಾ

ಬಾಳರಥ ಪಥ ಬದಲಿಸಿ ಚಲಿಸುತಿದೆ ಹೇಗೆ ತೊರೆಯಲಿ ನಿಮ್ಮನು ?
ಅಗಲಿಕೆಯ ನೋವು ಹೃದಯ ಹಿಂಡುತಿದೆ ಹೇಗೆ ತೊರೆಯಲಿ ನಿಮ್ಮನು ?

ರೆಪ್ಪೆ ಕಂಗಳ ಕಾದಂತೆ ಕಾಪಿಟ್ಟ ಘಳಿಗೆಗಳು ಹಚ್ಚ ಹಸಿರು ಎಂದೂ
ಕಣ್ಣ ಕಡಲೀಗ ಉಕ್ಕುಕ್ಕಿ ಹರಿಯುತಿದೆ ಹೇಗೆ ತೊರೆಯಲಿ ನಿಮ್ಮನು ?

ಪ್ರೀತಿ ಕೌದಿಯ ಬಿಸುಪು ತುಸುವೂ ಆರಲಿಲ್ಲ ಕಾಲ ಮಾಸಿದರೂ
ನೆನಪುಗಳ ದಾಳಿಗೆ ಜೀವ ತತ್ತರಿಸುತಿದೆ ಹೇಗೆ ತೊರೆಯಲಿ ನಿಮ್ಮನು ?

ಹೊರಡಬೇಕೆಂದರೂ ಕಾಲ್ಗಳು ಅಡಿ ಇಡದೆ ನಿಂತಲ್ಲೇ ನಿಂತಿವೆ
ಸಪ್ತಪದಿಯ ಸಂಭ್ರಮ ಮುಗಿಯುತಿದೆ ಹೇಗೆ ತೊರೆಯಲಿ ನಿಮ್ಮನು ?

ತವರ ನಂಟು ಕಳಚುವ ಕ್ಷಣ ಕರುಳ ಬಳ್ಳಿ ಕಡಿದಂತೆ ಹೆಣ್ಣಿಗೆ
ತೆರಳುವ ಸಮಯ ಸಮೀಪಿಸುತಿದೆ ಹೇಗೆ ತೊರೆಯಲಿ ನಿಮ್ಮನು ?

************************************

About The Author

admin

See author's posts