ಗಜಲ್
ಯ.ಮಾ.ಯಾಕೊಳ್ಳಿ
ನಾ ನೆನಪಿಸದೆ ಹೇಗಿರಲಿ ಅಂದೊಮ್ಮೆ ನೀನಾಡಿದ ಮಾತುಗಳನ್ನು
ಜೊತೆಗೂಡಿ ಆಡಿದ ಹಾಡಿದ ಮಾತುಗಳನು
ಅವುಗಳ ನೆನಪಿನಲೆ ಬಾಳಿರುವ ಬಡಜೀವ ಇದು
ನೆನಪಿಸದೆ ಹೇಗಿದ್ದೀತು ಪ್ರಸಾದವಾದ ಮಾತುಗಳನು
ಕೈ ಕೈ ಹಿಡಿದು ಊರ ತುಂಬೆಲ್ಲಾ ಆಡಿದ್ದೆವು ಗೆಳತಿ
ಮನದಂಗಳದಲಿ ಮಲ್ಲಿಗೆ ಅರಳಿಸಿದ ಮಾತುಗಳನು
ನನ್ನ ದನಿಗೆ ದನಿಯಾಗಿದ್ದೆ ನೀನು ದೇವತೆಯಂತೆ
ಅನುಮೋದಿಸಿದ್ದೆ ನೀನಂದು ಹೊಂಬಣ್ಣದ ಮಾತುಗಳನು
ನೀನುಮರೆತು ಹೋದೆ ಏನೂ ಅಲ್ಲದವಳಂತೆ
ಎದೆಯೊಳಗೆ ಹೂವರಳಿಸಿದ ಮಾತುಗಳನು
*******************************
About The Author
