ಮುಕ್ತತೆಯ ಹಂಬಲ
ಪೂರ್ಣಿಮಾ ಸುರೇಶ್
ಹೊರಟಿದ್ದೇನೆ ಎಂದಿನಂತೆ
ಬರಿಗಾಲಿನಲ್ಲಿ
ನಿನ್ನ ಪದತಳದ ಧೂಳು ತಾಕಿದವರ
ಹುಡುಕಲಿಕ್ಕೆ
ಕಣ್ಣಲ್ಲಿ ಮುಸುಕು ಹಾಕಿ ಕೂತಿರುವ
ಮೃದು ಹೂವಿನಂತಹ
ಮುದ್ದು ಮೊಲದಂತಹ ಸುಕೋಮಲ
ಪ್ರೀತಿ ಗಂಧ ಹಿಡಿದು
ತುಸುತುಸು ತೆರೆದ ಕದ
ಗುಸುಗುಸು ಮಾತಿನಲಿ
ಆಟವಾಡುತ್ತಿದೆ
ಹದಬೆಂಕಿ ಹೊಗೆಯ
ಧೂಪ ಪರಿಮಳಕೆ
ಎಲ್ಲವೂ ಕಾದಷ್ಟು
ಬೇಯುವಷ್ಟು
ಘಮಘಮಿಸಿ
ಸುಡುವಷ್ಟು ಬತ್ತಿ
ಮಹಾಪೂಜೆ
ಕಟ್ಟುಗಳ ಬಿಚ್ಚಿ ಕಡಮೆ ದಾಟಿ
ಜಗಳವಾಡಬೇಕು ಅನಿಸುತ್ತದೆ
ದೇವರಾದರೆ ಏನಂತೆ..
ಶಿಲೆಯೊಡಲಲ್ಲೇ ಬೆಂಕಿ
ದೇವರಾಗಿಸಿದ ಮೊಗಗಳಲಿ
ಮೌನ ಹೀರಿ ನಗು..
ಗರ್ಭಗುಡಿಯ ಹೊರಗೆ
ಆವರಣದಲಿ
ಭಕ್ತರ ಪ್ರಾರ್ಥನೆಯ ಕಂಬನಿ
ಹೆಪ್ಪುಗಟ್ಟಿದೆ
ಇದು ಶಬರಿತನ
ಪಾದಗಳು ನಿಶ್ಯಕ್ತವಾಗಿದೆ
ಮಹಾಶೂನ್ಯತೆ ಆವರಿಸಿದೆ
ನನ್ನನು ಮಂಜಿನಂತಹ ಮರೆವಿಗೆ
ಸರಿಸಿಬಿಡು
ಬೆಂಕಿಯನ್ನು ಒಡಲುಗೊಂಡವನೇ
ಮುಕ್ತಳಾಗಬೇಕು ನಿನ್ನಿಂದ.
About The Author
ಸೂಪರ್ ಪೂರ್ಣಿಮಾ
ಮುಕ್ತತತೆಯ ಹಂಬಲ ಪ್ರತಿ ಜೀವರಾಶಿಯ ಬಯಕೆ. ೧೨ನೇ ಶತಮಾನದ ಅಕ್ಕ ಮಹಾದೇವಿಯ ಹುಡುಕಾಟ ನಿಮ್ಮ ಕವಿತೆಯಲ್ಲಿ ಕಾಣಿಸಿತು. ಒಳಗೆ ಸುಳಿವ ಆತ್ಮ ಗಂಡೂ ಅಲ್ಲ,ಹೆಣ್ಣು ಅಲ್ಲ ಎನ್ನುತ್ತಾರೆ ವಚನಕಾರರು.
ಅಗ್ನಿ ದಿವ್ಯದ ಮುಕ್ತತೆ ಅಥವಾ ಬಿಡುಗಡೆಯ ಹಂಬಲಕೆ ತುಡಿಯುವುದು ಕವಿತೆ ಬಯಕೆ.
ಇಂತಹ ಬಿಡುಗಡೆ ,ಮುಕ್ತತತೆ ಬಯಸಿದ ಬಹುದೊಡ್ಡ ಕಾವ್ಯ ಪರಂಪರೆ ನಮ್ಮಲ್ಲಿದೆ.
ಕವಿತೆ ನಡಿಗೆ ಚಂದವಿದೆ.ಬಂಧವೂ ಸಹ…