ಕಾವ್ಯಯಾನ

ಮಳೆ ಹಾಡು...

ಆಶಾ ಜಗದೀಶ್

ತಾರಸಿಯಿಂದ ಇಳಿಯುತ್ತಿರುವ
ಒಂದೊಂದೇ ಹನಿಗಳನ್ನು
ನಿಲ್ಲಿಸಿ ಮಾತನಾಡಿಸಿ
ಮೆಲ್ಲಗೆ ಹೆಸರ ಕೇಳಿ
ಹಾಗೇ ಮೆಟ್ಟಿಲ ಮೇಲೆ
ನಯವಾಗಿ ಕೂರಿಸಿಕೊಂಡು
ಈಗ ಬಿಟ್ಟು ಬಂದವನ ನೆನಪೋ
ಬಂದು ಸೇರಿದವನ ನೆನಪೋ
ಒಮ್ಮೆ ಕೇಳಬೇಕಿದೆ

ಜಡಿ ಹಿಡಿದು ಸುರಿವಾಗ
ಯಾರ ಮೇಲಿನ ಮೋಹ
ಆವೇಶವಾಗಿ ಆವಾಹಗೊಳ್ಳುತ್ತದೆ
ಜೀವ ಮರಗುಟ್ಟುವ ಶೀತಲೆತೆಯೊಳಗೆ
ಬೆಂಕಿಯೊಂದನ್ನು ನಂದದಂತೆ
ಹೇಗೆ ತಾನೆ ಬಚ್ಚಿಟ್ಟುಕೊಂಡಿರುವೆ
ಎಂದಾದರೂ ಒಂದು ಸಣ್ಣ ಪ್ರಶ್ನೆಗೆ
ಉತ್ತರ ಕೇಳಿಟ್ಟುಕೊಳ್ಳಬೇಕಿದೆ

ಮುಚ್ಚಿದ ಕಿಟಕಿಯ ದಾಟಿ ಹಾಯುವ
ತಂಗಾಳಿ ಮೈ ಸೋಕುವಾಗೆಲ್ಲ
ಒಂದು ಮಳೆಹನಿಯ ಹಟದ ಮುಂದೆ
ಯಾವುದೂ ಸಮವಲ್ಲ ಎನಿಸಿಬಿಡುತ್ತದೆ
ಮತ್ತೆ ಮತ್ತೆ ಇಷ್ಟಿಷ್ಟೆ ಚೈತನ್ಯ ಒಟ್ಟಾಗಿಸಿಕೊಂಡು
ಹನಿಯುವ ಇಚ್ಛಾಶಕ್ತಿಗೆ ಜಗವೇ ಬಾಗಿದೆ
ಅಂತಲೂ ಋತುಚಕ್ರ ತಿರುಗಿದಾಗಲೆಲ್ಲಾ
ಅನಿಸುತ್ತಲೇ ಇರುತ್ತದೆ

ಸಣ್ಣದೊಂದು ಹನಿಯೊಡೆದು
ಸಹಸ್ರಪಟ್ಟು ಅಧಿಕ ಪಾದಗಳ ಗುರುತು
ಹನಿಗಳುದುರಿ ಹೋದದ್ದರ
ನೆನಪಿಗೆ ಭುವಿಯ ತುಂಬಾ ಬುಗುಟು
ಒಂದೊಂದು ಬುಗುಟಿನೊಳಗೂ
ಮಿಡಿವ ಹೃದಯ…

ಅದು ಸತ್ತಿಲ್ಲ
ಅದು ಬದುಕಿಯೂ ಇಲ್ಲ

*************