ಕಾವ್ಯ ಸಂಗಾತಿ
ವಾಣಿ ಯಡಹಳ್ಳಿಮಠ
ಗಜಲ್
ಗಜಲ್
ನೀವು ನನಗ್ಯಾರಿರಬಹುದೆಂದು ಎಷ್ಟೋ ಬಾರಿ
ನನಗೆ ನಾನೇ ಕೇಳಿಕೊಂಡಿದ್ದೇನೆ
ರಕ್ತ ಸಂಬಂಧವಂತೂ ಅಲ್ಲ,
ಅದ್ಯಾವ ನಂಟಿರಬಹುದೆಂದು ಅಂದುಕೊಂಡಿದ್ದೇನೆ
ಮನಸುಗಳು ಜಾತಿ, ಧರ್ಮ, ಭಾಷೆಗಳ
ಹೆಸರಲಿ ದೂರವಾಗಿವೆ ಇಲ್ಲಿ
ಅದ್ಯಾವುದೂ ನಮ್ಮ ಬಾಂಧವ್ಯಕೆ
ಅಡ್ಡಿಯಾಗಲಿಲ್ಲವೆಂದು ಅಚ್ಚರಿಗೊಂಡಿದ್ದೇನೆ
ಪರಸ್ಪರ ಪ್ರೀತಿ ,ಗೌರವ , ವಿಶ್ವಾಸಗಳೆಲ್ಲವೂ
ಬಲು ದುಬಾರಿಯಾಗಿರುವ ಕಾಲವಿದು
ಹೀಗಿರುವಾಗ ನಾವ್ಹೇಗೆ ಬಹು ವರ್ಷಗಳಿಂದ
ಜೊತೆಯುಳಿದೆವೆಂದು ದಿಗ್ಬ್ರಮೆಗೊಂಡಿದ್ದೇನೆ
ನಮ್ಮಲ್ಲಿಯೂ ಭಿನ್ನಾಭಿಪ್ರಾಯಗಳು
ಇಣುಕುವುದುಂಟು ಆಗಾಗ ಗೆಳೆಯರೇ
ಆದರೂ ದೂರಾಗುವ ದೂರಾಲೋಚನೆಯೂ
ಸುಳಿಯಲಿಲ್ಲ ಎಂದು ಸಂತಸಗೊಂಡಿದ್ದೇನೆ
ಅಳಿಯದ ಬಾಂಧವ್ಯ , ಆತ್ಮಗಳ ಮಿಲನ
ದೇವರೇ ಹೆಣೆದ ಸ್ನೇಹ ಸಂಬಂಧವಿದು ವಾಣಿ
ಜಗವು ಜೊತೆಯಿರದಿದ್ದರೂ ನನ್ನೊಂದಿಗೆ
ಎಂದಿಗೂ ನೀವಿರುವಿರೆಂದು ನೆಚ್ಚಿಕೊಂಡಿದ್ದೇನೆ
ವಾಣಿ ಯಡಹಳ್ಳಿಮಠ
