ವಾಣಿ ಯಡಹಳ್ಳಿಮಠ ಅವರ ಗಜಲ್

ಕಾವ್ಯ ಸಂಗಾತಿ

ವಾಣಿ ಯಡಹಳ್ಳಿಮಠ

ಗಜಲ್

 ನಾವು ಮೊದಲು ಭೇಟಿಯಾದ ದಿನ ಮರಳಿ ಪಡೆದುಕೊ  ಅಪರಿಚಿತರಾಗೋಣ
ನೀ  ಮೊದಲು ನೀಡಿದ ಸಮಯವನ್ನೆಲ್ಲಾ ಮರಳಿ ತೆಗೆದುಕೊ  ಅಪರಿಚಿತರಾಗೋಣ

ನನ್ನೆಲ್ಲಾ ಮಾತುಗಳಿಗೂ ನೀ ನಗುವಾಗುವ ಕ್ಷಣಗಳೂ ಇದ್ದವು, ದಿನಗಳೂ ಇದ್ದವು
ಆ ದಿನಗಳ ಸಂತಸವನೂ , ನೆನಪನೂ ಮರೆಯದೇ ಕಸಿದುಕೊ  ಅಪರಿಚಿತರಾಗೋಣ

ನಾನೆಂದರೇ ಸ್ನೇಹದ ಪ್ರತೀಕ ಎಂದೆನ್ನುತ್ತಿದ್ದ ಸಂಭ್ರಮದ ವಸಂತ ಕಾಲವೊಂದಿತ್ತು  ಗೆಳೆಯ  
‘ನೀನೆಂದರೆ  ಇಷ್ಟ ‘ಎನ್ನುತಿದ್ದ ಮಾತುಗಳ ಮಾಲೆ ಹಿಂತೆಗೆದುಕೊ  ಅಪರಿಚಿತರಾಗೋಣ

ಮಳೆ , ಹುಣ್ಣಿಮೆ ಎಂದ್ಹೇಳಿ ಹೊಗಳುತ್ತಿದ್ದ ಸುಂದರ ಸಮಯವೊಂದಿತ್ತು  
ಆಡಿದ ಅಷ್ಟೂ ಮಾತುಗಳನು  ಮನಸಲ್ಲಿಯೇ ಮಸೆದುಕೊ ಅಪರಿಚಿತರಾಗೋಣ

ವಾಣಿಯ ಪ್ರತಿ ಕವಿತೆಯಲ್ಲಿಯೂ ನೀ ಇಂದಿಗೂ ಭಾವವಾಗಿ ಇಣುಕುವೆ  
ನಾ ಬೇಡ ಎಂಬ ಭಾವನೆಯೊಮ್ಮೆ ಮನಸಾರೆ ಹೊಸೆದುಕೊ ಅಪರಿಚಿತರಾಗೋಣ

——————————-
ವಾಣಿ ಯಡಹಳ್ಳಿಮಠ