ಕಾವ್ಯ ಸಂಗಾತಿ
ಹಮೀದಾಬೇಗಂ ದೇಸಾಯಿ
ಯಾರದೋ ತಪ್ಪಿಗೆ…ಯಾರಿಗೋ ಶಿಕ್ಷೆ …
ಮುಂಗಾರಿನ ಮುತ್ತು
ಹನಿಗಳ ಸಿಂಚನ
ಜೀವಕುಲಕಾಯ್ತು
ಸಂತಸದ ರೋಮಾಂಚನ
ಹಸಿರು ಮುಡಿದ
ಭೂತಾಯಿಗೆ ಸಮಾಧಾನ
ಬದುಕಿನ ಜೀವಸೆಲೆ
ತುಂಬಿತದೋ ಪೂರ್ಣ
ಸುಂಯ್ಯೆಂಬ ಗಾಳಿಯ
ಬಳುಕುವ ನರ್ತನ
ಎಲ್ಲೆಲ್ಲೂ ಚೆಲುವುನೂತನ…
ಅದೇನೋ
ಸಿಟ್ಟು , ಆಕ್ರೋಶ
ಗುಡ್ಡ ಬೆಟ್ಟಗಳಿಗೆ
ಮನುಜನ ಸಲ್ಲದ
ಕಿತಾಪತಿಗಳಿಗೆ…
ಒಡಲಲವಿತಿಟ್ಟ
ಕೋಪಾರೋಷಗಳು
ಸಿಡಿದೆದ್ದವು ಒಮ್ಮೆಲೇ
ಸ್ಫೋಟಗೊಂಡು..
ಮುಗಿಲು ಹರಿದು
ಬಿದ್ದಂಥ ಭೀಕರ ಮಳೆಯಲೇ…
ಕುಸಿದ ಮಣ್ಣ
ಗುಡ್ಡೆಯಡಿ
ದಾರಿ, ಲಾರಿ ,ಕಾರು ,ಊರು
ಮನೆ ,ಜನ,ದನ, ಕರು
ಎಲ್ಲವೂ ನಾಪತ್ತೆ ;
ಮಣ್ಣ ಜೊತೆಗೇ
ಮಣ್ಣಾಗಿ ಹೋದವೆಲ್ಲವೂ
ಕಣ್ ಮುಂದೆಯೇ
ಗುರುತೂ ಉಳಿಯದಂತೆ…
ಹೌಹಾರಿದೆ ಜಗವು
ಮೂಕನಾಗಿ
ಎಂದೂ ಕೇಳದ ಕಂಡರಿಯದ
ನಿಸರ್ಗದ ಅಟ್ಟಹಾಸಕೆ
ನಿಷ್ಕರುಣೆಯ ರೌದ್ರಕೇಕೆಗೆ…
ಇದು ಮುಂಗಾರೋ..?
ಪ್ರಕೃತಿ ಕೊಟ್ಟ ಶಿಕ್ಷೆಯೋ..?
ಯಾರದೋ ತಪ್ಪಿಗೆ..ಯಾರಿಗೋ ಶಿಕ್ಷೆ…!!!
ಹಮೀದಾಬೇಗಂ ದೇಸಾಯಿ
ಮನ ಕುಲುಕುವ ಕವಿತೆ
ಸ್ಪಂದನೆಗೆ ಧನ್ಯವಾದಗಳು
ಹಮೀದಾಬೇಗಂ.
ದೇವರ ಆಟ, ಭೂಮಿ ತಾಯಿಯ ಪಾಠ…. ಚಿಂತನಾರ್ಹ ರಚನೆ.
ಸ್ಪಂದನೆಗೆ ಧನ್ಯವಾದಗಳು ತಮಗೆ..
ಹಮೀದಾಬೇಗಂ.
ವಾಸ್ತವ ಪರಿಸ್ಥಿತಿ ತೆರೆದಿಟ್ಟ ಕವನ.. ಪ್ರಕೃತಿ ವಿಕೋಪದ ಮುಂದೆ ಮನುಷ್ಯ, ಜೀವಸಂಕುಲ ಜರ್ಜರಿತ..ಮನ ಕಲಕಿದ ಕವನ ಮೇಡಂ
ಸ್ಪಂದನೆಗೆ ಧನ್ಯವಾದಗಳು..
ಹಮೀದಾಬೇಗಂ..