ಕಾವ್ಯ ಸಂಗಾತಿ
ಶುಭಲಕ್ಷ್ಮಿ ಆರ್ ನಾಯಕ್
ಒರೆಸುವರಾರು ಸಖಿಯೆ?
ಕಂಬನಿ ಹನಿಗಳ ಸುರಿಸುತ ಇದ್ದರೆ
ಒರೆಸುವರಾರು ಸಖಿಯೆ
ಕತ್ತಲ ಕೋಣೆಯು ಅರಿಯದು ನಿನ್ನ
ಕಣ್ಣಿನ ಹನಿಗಳು ಸುರಿಯೆ//
ಕಾಣದು ಒಡಲಿನ ಉರಿಗಳ ಬೇಗುದಿ
ಕಣ್ಣೇ ಇರದಿಹ ಕುರುಡರಿಗೆ
ನೋವಲಿ ಬೇಯುವ ಬದಲಿಗೆ ನೀನು
ಛಲದಲಿ ಎದ್ದರೆ ಶುಭಗಳಿಗೆ//
ಸಾಧನೆ ಎನ್ನುವ ಶರಧಿಯ ಆಳವ
ಮುಳುಗಿ ಏಳಲೇ ಬೇಕಂತೆ
ಸುಮ್ಮನೆ ಅರಚುವ ಬಾಯಿಗೆ ನೀನು
ಬೀಗವ ಹಾಕು ಸಾಕಂತೆ//
ಸಟೆಯನು ಆಡುವ ಸುಳ್ಳರ ಮಾತಿಗೆ
ಗಮನವ ಎಂದೂ ಹರಿಸದಿರು
ನಿನ್ನಯ ಕಾರ್ಯವ ದಿಟದಲಿ ಮಾಡುತ
ಗಮ್ಯವ ನೀನು ತಲುಪುತಿರು//
ನಿನ್ನೊಳಗಿರುವ ವಿಶ್ವಾಸದ ದೀಪವ
ಹಚ್ಚು ದಿಟ್ಟ ಹಣತೆಯಲಿ
ಭರವಸೆ ಎನ್ನುವ ತೈಲವ ನಿಕ್ಕುತ
ಬತ್ತಿಯ ಉರಿಸು ಧೈರ್ಯದಲಿ//
ತುಳಿತವ ಕಂಡ ಮನಗಳೆ ಮೇಲಕೆ
ಎದ್ದು ನಿಲ್ಲುವವು ನೋಡಲ್ಲಿ
ಕೆಸರಿನ ಕೊಳದಲಿ ಹುಟ್ಟಿದ ಪಂಕಜ
ಅರಳುವ ಪರಿಗೆ ಬಾಗಲ್ಲಿ//
ಫಲಗಳು ತುಂಬಿದ ತರುವಿಗೆ ಮಾತ್ರವೆ
ಕಲ್ಲನು ಎಸೆವರು ಬೀಳಿಸಲು
ಒಳಿತನು ಮಾಡಲು ಹೊರಟರೆ ಜಗದಲಿ
ಎಳೆವರು ಕಾಲನು ಸೋಲಿಸಲು//
ಮನದಲಿ ಮರುಗುತ ಕುಳಿತರೆ ಗೆಳತಿ
ಕಾರ್ಯವು ಕೆಡುವುದು ಕೇಳಮ್ಮ
ನಿನಗೆ ನೀನೇ ಧೈರ್ಯವ ತುಂಬುತ
ಬದುಕಿನ ಸಾಗರ ದಾಟಮ್ಮ//
ಶುಭಲಕ್ಷ್ಮಿ ಆರ್ ನಾಯಕ್
ಶುಭಲಕ್ಷ್ಮಿ ಆರ್ ನಾಯಕ್
ಧನ್ಯವಾದಗಳು,
ಶುಭವಾಗಲಿ ಪತ್ರಿಕೆಗೆ, ಸಂಪಾದಕರಿಗೆ.
…..ಶುಭಲಕ್ಷ್ಮಿ.
ಛಲದಲಿ ಎದ್ದರೆ ಶುಭಗಳಿಗೆ…
ಗಮ್ಯವ ನೀನು ತಲುಪುತ್ತಿರು…
ಕವಿತೆಯ ಈ ಸಾಲುಗಳು ಮನವ ಹುರಿದುಂಬಿಸುವಂತಿದೆ
ನಾಗರಾಜ ಜಿ ಎನ್ ಬಾಡ