ಮೀನಾಕ್ಷಿ ಸುರೇಶ್ ಭಾಂಗಿ-ನನ್ನವನೆಂದರೆ

ಕಾವ್ಯ ಸಂಗಾತಿ

ಮೀನಾಕ್ಷಿ ಸುರೇಶ್ ಭಾಂಗಿ

ನನ್ನವನೆಂದರೆ

ನನ್ನೊಳಗಣ ಅನಂತ ಚೇತನ
ಮನಸ ಬೇಗುದಿಗೆ ಮುತ್ತನಿರಿಸಿ
ಬಾಳ ಬಾನಲ್ಲಿ ಬಣ್ಣ ತುಂಬಿದವನು
ಕೈ ಕೈ ಜೋಡಿಸಿ,ಕೈ ಬಿಡಲಾರದ
ಅಸ್ಮಿತೆಯ ಸ್ಮಿತವದನದ
ಸುಂದರ ಗಾಳಿಪಟ ಹಾರಿಸಿದವನು…

ನನ್ನವನೆಂದರೆ…
ನಡೆದಾಡುವ ವಿಶ್ವಕೋಶ
ಬದುಕ ನಾಟಕದ ಎಲ್ಲ ಪಾತ್ರಗಳ
ಏಕತಾನತೆಯ ಕಿತ್ತೊಗೆದು
ಅನುಭವಿಸಿ ನುಡಿವ ಅನುಭಾವಿ ಇವನು
ದಿಕ್ಕೆಟ್ಟ ಮನಸಿನ ಓಟಕೆ
ದಿಟ್ಟತನದಲಿ ತೆರೆಕಟ್ಟಿ
ಅಧ್ಯಾತ್ಮದ ಅಮೃತವ ಉಣಬಡಿಸಿದವನು

ನನ್ನವನೆಂದರೆ…
ನನ್ನ ಪ್ರಾಣ,ನನ್ನೊಳಗಣ ಜೀವನ್ಮಿಡಿತ
ಕಣ್ಣ ಹನಿಗಳಿಗೆ ಮುತ್ತ ಪೇರಿಸಿ
ಸಿರಿಯ ಸುಖಕೆ ಒಲವ ಸೇರಿಸಿ
ಜೀವ ಜೀವದ ಜೀವವಾದವನು
ಮನದ ಮರೆವಿಗೆ,
ಇಂದ್ರಿಯ ತಾಮಸಕೆ
ವಿಷಯಕ್ಕೆಳಿಸಿದ
ಮನದ ಮರ್ಕಟಕೆ
ಕಾಯಕದ ಹಣತೆ ಹಚ್ಚಿ
ಬಾಳ ಬೆಳಗಿದವನು…

ನನ್ನವನೆಂದರೆ,…
ಹಾಲುಗೆನ್ನೆಯ ಹಸುಗೂಸು
ನನ್ನಲ್ಲಿಯ ತಾಯ ಹಂಬಲಕೆ
ಸಂದ್ಯೆಯ ಸೆರಗಿನಲ್ಲಿ
ಕರು ನೆನಪಾದ ಹಸುವಿನಂತೆ
ಪ್ರೀತಿ ಸೆಳೆತಕೆ ಕಿವಿಯಾದವನು
ಅವನೇ ಪ್ರಾಣ,ತ್ರಾಣ,ಜೀವನ
ಸಾಟಿಯಿಲ್ಲ ಅವಗೆ,
ಜೀವನಾಡಿಯ ಕಂಪನ
ನನ್ನೆದೆಯ ಕಸುವಿಗೆ,
ಜ್ಞಾನದ ಹಸಿವಿಗೆ
ಪತಿ ಎಂಬ ಹೆಸರಿನಿಂದ ಉಸಿರಾದವನು..

---

ಮೀನಾಕ್ಷಿ ಸುರೇಶ್ ಭಾಂಗಿ