ಕಾವ್ಯ ಸಂಗಾತಿ
ಸೂರ್ಯೋದಯ ಸೊಬಗು
ಡಾ.ಸುಮತಿ ಪಿ.
ಮುಂಜಾನೆ ಸಮಯ ಬಾನಿನ ತುಂಬ
ಕೆಂಪಿನ ರಂಗದು ಚೆಲ್ಲುತ ಪಸರಲು
ಮೋಡವ ಸರಿಸುತ ಭಾನು ಮೂಡಿದ
ಭುವಿಯ ತುಂಬ ಬೆಳಕನು ಹರಡಲು
ಹಕ್ಕಿಗಳು ಗೂಡಲಿ ಚಿಲಿಪಿಲಿ ಗುಟ್ಟುತ
ಸೂರ್ಯನ ಆಗಮನಕೆ ಸ್ವಾಗತಕೋರಲು
ನೇಸರ ಕಿರಣಕೆ ಚೇತನವನು ತುಂಬಿ
ಮುದುಡಿದ ತಾವರೆ ಬಿರಿದು ನಿಲ್ಲಲು
ಮರಗಿಡ ಮುತ್ತಿಕ್ಕಿದ ಇಬ್ಬನಿ ಹನಿಯು
ನಾಚುತ ಕರಗಿ ನೀರಾಗಿ ಹರಿಯಲು
ವನದಲಿ ತುಂಬಾ ಒಲವಿನ ಗಾನವು
ನವಿಲು ಗರಿಗೆದರುತ ನಾಟ್ಯವಾಡಲು
ಗಗನವ ಮುಸುಕಿದ ಸಾಲು ಮೋಡವು
ಸೂರ್ಯನ ಕಂಡು ಮರೆಯಲಿ ಅಡಗಲು
ಕಚಗುಳಿಯಿಡುವ ಬಿಸಿಲದು ಚಂದವು
ಹೊನ್ನಿನ ಹೊಂಗಿರಣ ಭುವಿಗೆ ಸೋಕಲು
ಧರಣಿಯಲಿ ನೆಲೆಸಿದ ಜೀವಿ ಸಮೂಹ
ಚೈತನ್ಯವ ಪಡೆಯುತ ಉಲ್ಲಾಸ ತುಂಬಲು
ಭೂಮಿ ಇಬ್ಬನಿಯಲಿ ಮಿಂದು ಮಡಿಯು
ಸ್ವರ್ಗ ಸೌಂದರ್ಯ ತುಂಬಿ ತುಳುಕಲು
ಡಾ.ಸುಮತಿ ಪಿ
