ಕಾವ್ಯ ಸಂಗಾತಿ
ಮಾರುತೇಶ್ ಮೆದಿಕಿನಾಳ
ಜೈಲಿನೊಳಗಿನ ಜೀವ
ದಿನಕ್ಕೊಂದು ತರತರದ ಚಿಂತೆಗಳುಟ್ಟುತಾವೋ
ಬೇಡವೆಂದರೂ ಬೆನ್ನತ್ತಿ ಕಾಟ ಕೊಡುತಾವೋ
ಶಾಂತಿ ನೆಮ್ಮದಿ ಸಪ್ಪಗೆ ಮೂಲೆ ಸೇರ್ಯಾವೋ
ಓ ಜೀವವೇ ನಿನಗೆ ಕಷ್ಟಗಳ್ಯಾಕೆ ಮೂಲಾಗ್ಯಾವೋ!
ಒಂದಲ್ಲ ಎರಡಲ್ಲ ಹಲವಾರು ಆಲೋಚನೆಗಳು
ತಲೆಯೊಳಗೆ ಹಾವಿನಂತೆ ಹರಿದಾಡುತಾವೋ
ಭಯ ಭುಗಿಲು ದುಃಖ ಆತಂಕ ಎದ್ದೇಳುತಾವೋ
ಓ ಜೀವವೇ ನೂರಾರು ಕಿರಿಕಿರಿ ನಿನ್ನ ಸುತ್ತುಗಟ್ಯಾವೋ!
ಆಗಾಗ ಆಸೆಗಳು ಗಿರಿಬಿಚ್ಚಿ ಹಾರಾಡುತಾವೋ
ಬಯಕೆಗಳು ಬಹಳ ಕೇಕೆ ಹಾಕಿ ಕುಣಿದಾಡುತಾವೋ
ಡೌಲು ಸೊಕ್ಕು ಧಿಮಾಕು ದಿಕ್ಕೆಡಿಸುತಾವೋ
ಓ ಜೀವವೇ ನೋವುಗಳು ನಿನಗ್ಯಾಕೆ ಕಾಡುತಾವೋ!
ಖುಷಿ ಸಂತೋಷ ಆಗಾಗ ಇಣುಕಿ ನೋಡುತಾವೋ
ದ್ವೇಷ ರೋಷ ಸೇಡು ಸಿಟ್ಟು ಕುಣಿದಾಡುತಾವೋ
ಒಳ್ಳೆಯದು ಕೆಟ್ಟದ್ದು ಜೊತೆ ಜೊತೆ ಬರುತಾವೋ
ಓ ಜೀವವೇ ಎಲ್ಲವೂ ಸೇರಿ ನಿನ್ನ ಜೈಲಿನೊಳಗಿಟ್ಟಾವೋ!
