ಕಾವ್ಯ ಸಂಗಾತಿ
ಮಹಾದೇವಿ ಪಾಟೀಲ
ಮಂಕಾದ ಜಯಂತಿಗಳು
ಗಾಂಧಿ ಬುಧ್ದ ಬಸವ ಅಂಬೇಡ್ಕರರ
ಜಯಂತಿಗಳು ಮಂಕಾಗಿ ಹೋಗಿವೆ
ಶ್ರೀಮಂತರ ರಾಜಕಾರಣಿಗಳ ಸೆಲೆಬ್ರೇಟಿಗಳ
ಹುಟ್ಟು ಹಬ್ಬಗಳ ಅಬ್ಬರದ ಮುಂದೆ||
ದಿವ್ಯ ನೇತಾರರ ಭವ್ಯ ಮೂರ್ತಿಗಳು
ಮಸುಕಾಗಿ ಹೋಗಿವೆ ನೋಡುವವರೇ ಇಲ್ಲ
ದಿನಕ್ಕೊಂದರಂತೆ ನೇತು ಹಾಕುವ
ದೊಡ್ಡ ದೊಡ್ಡ ಕಟೌಟ್ ಗಳ ಮುಂದೆ||
ಮಹಾಮಹಿಮರ ಆದರ್ಶದುಕ್ತಿಗಳು
ಅರ್ಥ ಕಳೆದುಕೊಂಡು ಸೊರಗಿವೆ
ಜಾತೀಯತೆಯನು ಎತ್ತಿ ಹಿಡಿದು
ಮಾತಾಡುವ ಪೊಳ್ಳು ಭಾಷಣಗಳ ಮುಂದೆ||
ದೇಶಕ್ಕಾಗಿ ತ್ಯಾಗ ಬಲಿದಾನಗೈದ
ಸಾಹಸದ ಕಥೆಗಳು ಕೇವಲ ಇತಿಹಾಸವಾಗಿವೆ
ಸ್ವಪ್ರಶಂಸೆ,ಸ್ವಪ್ರತಿಷ್ಠೆ,ಸ್ವಹಿತಾಸಕ್ತಿಗಳ
ನಾಟಕೀಯ ಬದುಕಿನ ಮುಂದೆ||
ಮಹಾದೇವಿ ಪಾಟೀಲ..
