ಕಾವ್ಯ ಸಂಗಾತಿ
ಕಾವ್ಯ ಸಂಗಾತಿ
ಅರ್ಚನಾ ಯಳಬೇರು
ಜುಲ್ ಕಾಫಿಯ ಗಜಲ್
ಅಂತರಂಗದ ತುಮುಲಗಳಿಗೆ ತವರಾದ ಭಾವನೆಗಳೇ ಬಡವಾಗದಿರಿ
ಬತ್ತಿದೆದೆಯಲ್ಲಿ ಅರಳಲು ಹವಣಿಸುವ ತೋಯಜಗಳೇ ಮುದುಡದಿರಿ
ಆದೀತೇ ಸುಖ ಪ್ರಸವವು ಭೃಮೆಯೊಳು ಬಸಿರಾದ ಭವ್ಯ ಕನಸುಗಳಿಗೆ
ವ್ಯಥೆಯ ಬಲೆಯೊಳು ಸಿಲುಕಿ ಸೆಣಸುತಿಹ ನಲಿವುಗಳೇ ನರಳಾಡದಿರಿ
ನಿತ್ಯ ಕಾಯುತಿದೆ ಹೃದಯದವನಿಯು ಹಚ್ಚ ಹಸಿರಾಗಿ ಕಂಗೊಳಿಸಲು
ಪ್ರೀತಿ ಭಿಕ್ಷೆಯ ಬೇಡುತಲಿ ಬಸವಳಿದ ನಿಟ್ಟುಸಿರುಗಳೇ ಅಸುನೀಗದಿರಿ
ಮರೆಯಲ್ಲೆ ನಗುತಿದೆ ನಗ್ನ ಸತ್ಯವು ತಿರುಳಿಲ್ಲದ ಸಲ್ಲಾಪಗಳ ನಡುವಲಿ
ಒಲವ ಮುಂಜಾನೆಯಲಿ ಉಲಿವ ಪ್ರೇಮ ವಿಹಗಗಳೇ ವಿರಮಿಸದಿರಿ
ನೇಪಥ್ಯಕ್ಕೆ ಸರಿದ ನಲ್ನುಡಿಗಳು ಅರಸದಿರಲಿ ಆಪ್ತತೆಯನು ಅರ್ಚನಾ
ಕಬ್ಬಿನ ಜಲ್ಲೆಯಂತಾದ ಬದುಕಲಿ ಜನಿಸುವ ಭರವಸೆಗಳೇ ಕ್ಷೀಣಿಸದಿರಿ
About The Author
ಅದ್ಭುತ ಸುಂದರ ಗಝಲ್
Sripad Algudkar ✍️