ಕಾವ್ಯ ಸಂಗಾತಿ
ಅರುಣಾ ನರೇಂದ್ರ
ನಾನು ನಿನ್ನ ಹಾಗೆ ಹುಚ್ಚು ಹಿಡಿಸಿಕೊಂಡಿದ್ದೇನೆ
ಅಕ್ಕ ನಾನು ನಿನ್ನ ಹಾಗೆ ಹುಚ್ಚು ಹಿಡಿಸಿಕೊಂಡಿದ್ದೇನೆ
ನನ್ನ ಚೆನ್ನಮಲ್ಲಿಕಾರ್ಜುನನಿಗಾಗಿ
ಕಾಡುವ ಬೇಡುವ ತೊಗಲ ತೀಟೆಯ
ಗಂಡುಗಳನೊಯ್ದು ಗುಂಡು ಹಾಕವ್ವಎಂದು
ಅವನಿಗಾಗಿಯೇ ಕೊರಗುತ್ತೇನೆ ಕರಗುತ್ತೇನೆ || ಅಕ್ಕ||
ಹುಡುಕುತ್ತೇನೆ ಗುಡಿ ಗುಂಡಾರಗಳಲಿ
ಬಾರಿನ ಅಂಗಡಿ ಉದ್ಯಾನ ಮಹಲುಗಳಲಿ
ಗಂಗೆ ನಿಂಗಿಯರ ಗುಡಿಸಲು ಗಳಲಿ
ಕೇಳುತ್ತೇನೆ ನವಿಲು ಗಿಳಿ ಕೋಗಿಲೆ ಕಬ್ಬಕ್ಕಿಗಳ
ನೀವು ಕಂಡೀರೆ ನೀವು ಕಂಡೀರೆ
ಅರಿಸುತ್ತೇನೆ ಬೆಳ್ಳಕ್ಕಿ ಗೊರವಂಕಗಳ ಹಿಂಡಿ ನೊಳಗೆ || ಅಕ್ಕ||
ಹಸಿವು ನೀರಡಿಕೆಗಳ ಸಹಿಸಿಕೊಂಡ ನನಗೆ
ಅವ ಕುಡಿಸಿದ್ದಾನೆ ಬಹುಕರಣೆ ಯಿಂದ
ಏಳು ಕೆರೆಯ ನೀರ !
ಹೇಗೆ ಮರೆಯಲಿ ಅಕ್ಕ ?|| ಅಕ್ಕ||
ಕೈಹಿಡಿದು ಕಾಣದಾದ ಮಾಯಕಾರನ
ಗುರುತು ಹೇಳಲೇನೇ ಅಕ್ಕ
ಗುಂಗುರು ಕೂದಲ ಗೊರವ
ಸ್ಮಶಾನವಾಸಿ
ಅಲ್ಲಲ್ಲ ..ಶಾಂತಿ ನಿವಾಸಿ !||ಅಕ್ಕ||
ಅಕ್ಕ ನೀನು ಲೌಕಿಕ ಗಂಡನ ಧಿಕ್ಕರಿಸಿ
ತೊಟ್ಟ ಅರವಿಯ ಹಂಗ ಹರಿದೊಗೆದಿ
ಗಿರಿಯ ತುದಿ ತಲುಪಿದಿ
ನಾನು… ಪತಿಯೆ ಪರ ದೈವವೆಂಬ
ಹುಚ್ಚು ಭ್ರಮೆಯಲ್ಲಿ
ತೊಟ್ಟುಕೊಂಡಿದ್ದೇನೆ ಬಂಧನದ ಬಳೆಗಳನ್ನು ||ಅಕ್ಕ||
ಒಳಗೊಳಗೆ ಕುದಿ ಕುದಿದು ಹಲಬು ಗೆಟ್ಟು ಹುಡುಕುತ್ತಿದ್ದೇನೆ
ಹುಬ್ಬುಗಂಟಿಕ್ಕಿದ
ಕೆಂಗಣ್ಣ ಕಾಲ ರುದ್ರನಿಗಾಗಿ
ಭಾವನಾತ್ಮಕ ಕವಿತೆ..
ಚೆಂದ ಸಂವೇದನೆ ಕವಿತೆ..ಅಕ್ಕನ ಅರ್ಥ ದ್ವಿಗುಣವಾಯಿತು.
ಅಕ್ಕನ ಭಾವ ದಕ್ಕಿಸಿಕೊಂಡ ಗಜಲ್
ಭಾವಪೂರ್ಣ ಕವಿತೆ, ಮನಸ್ಸು ತುಂಬಿ ಬಂತು ಮೇಡಂ….. ಬಾಲನಾಗಮ್ಮ