ಕಾವ್ಯಸಂಗಾತಿ
ಸ್ಥಾನ ಗಿಟ್ಟಿಸಿಕೊಂಡವರು
ಯೋಗೇಂದ್ರಾಚಾರ್ ಎ ಎನ್
ಮನೆಯ ಹಬ್ಬದಲಿ
ತಟ್ಟೆ ಲೋಟ ಹಿಡಿದು
ಸಿಹಿ ಹೋಳಿಗೆಯ ಪಡೆದು
ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ
ತಟ್ಟೆ ಲೋಟಗಳಷ್ಟೇ ಅಲ್ಲ
ಕೈ ಕಾಲು ಹಿಡಿದರೂ
ಹೂರಣದ ಘಮಲು
ಕಾಣದ ಕಣ್ಮಣಿಗಳು
ಜಾಗಟೆ ಬಾರಿಸಿದ್ದಾರೆ
ಬೀದಿ ಬೀದಿಗಳಲ್ಲಿ
ದೊಂಬರಾಟ ನಡೆಸಿ
ಮನೆ ಹೋಳಿಗೆಯ
ಹೂರಣಕ್ಕೆ ಹೇಸಿಗೆಯ ಮೆತ್ತಿ
ಹೆದರಸಿ ಬೆದರಿಸಿ
ಮನೆಯಲ್ಲೇ
ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ
ಮತ್ತೊಷ್ಟು ಮನೆ ಮಂದಿ
ಮನೆಗೆ ಬೆಂಕಿ ಹಚ್ಚಿದ್ದಾರೆ
ಬೇರೊಂದು ಮನೆ ಕಟ್ಟಿ
ಹೊಸ ಮನೆ ಪ್ರವೇಶಕ್ಕೆ
ಹೋಳಿಗೆಯ ತಟ್ಟಿದ್ದಾರೆ
ಸಗ್ಗದ ಗೂಡು ಸೇರಿದ
ಷರೀಫಜ್ಜನನ್ನು ಕರೆದು
ಸರ್ವಜ್ಞ ಚೌಡಯ್ಯರಿಗೆ
ಸಜ್ಜೆಯನು ನೀಡಿ
ಬೆಂಕಿ ಹಚ್ಚಿದವರ
ಕೈ ಹಿಡಿದು
ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ
ಈ ಮನೆ ಇಲ್ಲದಿದ್ದರೂ
ಆ ಮನೆಯಲ್ಲಿ
ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ
