ಕಾವ್ಯ ಸಂಗಾತಿ
ಮುಕ್ತಕಗಳು
ಮಹೇಶ್ ಹೆಗಡೆ ಹಳ್ಳಿಗದ್ದೆ
ಬೆಲ್ಲವದು ಬದುಕಿನಲಿ ಅನುಭವದ ಮಾತುಗಳು
ಅಲ್ಲಗಳೆಯದೆ ನೀನು ಸ್ವೀಕರಿಸು ಬಾಗಿ ||
ಬಲ್ಲವರ ಬೋಧನೆಯ ಸಾರವನು ತಿಳಿಯುತ್ತ
ಎಲ್ಲರೊಳು ಬೆರೆಯುತಿರು – ಅಂತರಾತ್ಮ ||
ಕೆಸರಿನಲಿ ತಾನರಳಿ ಕೊಳೆಯಿಂದ ದೂರವಿದೆ
ಪಸರಿಸುತ ಪರಿಮಳವ ಹೆಸರು ಅರವಿಂದ ||
ನಸುನಗುತ ಕೊಳೆಯನ್ನು ಸರಿಸುತಿರು ಅನುದಿನವು
ಹೊಸತನಕೆ ತೆರೆಯುತಲಿ – ಅಂತರಾತ್ಮ ||
ಚಿತ್ತದೊಳು ಬಿತ್ತಿರುವ ಉತ್ತಮದ ಸಂಸ್ಕಾರ
ಸುತ್ತಿರುವ ಸಂಕೋಲೆ ಬಿಚ್ಚುವುದು ಖಚಿತ ||
ನೆತ್ತಿಯಲಿ ಅನವರತ ಸತ್ಯವನೆ ಚಿಂತಿಸುತ
ಎತ್ತರಕೆ ನಡೆಯುತಿರು – ಅಂತರಾತ್ಮ ||
ದಿನಕರನು ದಿನದಿನವು ಜನಿಸುವನು ಮರೆಯದೆಯೆ
ದಿನಚರಿಯು ಅವನಿಗದು ಬಿಡುವಿರದ ಕೆಲಸ ||
ಮನುಜ ಜನುಮದಲಿ ಜನಿಸಿರುವ ನೀ ಅರಿಯುತಿರು
ಜನುಮ ಜನುಮದ – ಅಂತರಾತ್ಮ ||
ನೋವು ನಲಿವುಗಳೆಲ್ಲ ಬಂದುಹೋಗುವ ಅತಿಥಿ
ಸಾವು ಬರುವನಕ ಸಹಿಸುತಿರು ಅದನೆಲ್ಲ ||
ಜೀವನದ ಪಯಣದಲಿ ಸತ್ಯವನು ಹುಡುಕುತ್ತ
ಸಾವಿನಲಿ ಸುಖಕಾಣು – ಅಂತರಾತ್ಮ ||
ಮಹೇಶ್ ಹೆಗಡೆ ಹಳ್ಳಿಗದ್ದೆ
ಹೃತ್ಪೂರ್ವಕ ಧನ್ಯವಾದಗಳು
ಸೂಪರ್ ಕವನ ರಚನೆ ಸರ್