ಕಾವ್ಯ ಸಂಗಾತಿ
ನಾನು ಬರುವವರೆಗೂ
ಅನಸೂಯ ಜಹಗೀರದಾರ
ನಾನು ನಿನ್ನನು
ಸೇರುವವರೆಗೂ
ಕಾಪಿಟ್ಟಕೋ
ಇದಿಷ್ಟನೂ..
ನೀನೇ ವರ್ಣಿಸುವ
ನಾನೆಂಬ ಈ
ಪ್ರಕೃತಿಯ ಅಚ್ಚರಿಯನ್ನು
ಒನಪು ವಯ್ಯಾರವನ್ನು
ಆಗಾಗಿನ ಖತಿಯನ್ನು
ಕುಶಾಗ್ರ ಮತಿಯನ್ನು
ಸಂತೈಸುವ ಗತಿಯನ್ನು
ನಿನಗಾಗಿ ತುಡಿವ ಹೃದಯವನ್ನು
ಸಂಗಾತಕ್ಕಾಗಿ ಹಂಬಲಿಪ ಆತ್ಮವನ್ನು
ಸದಾ ನೆನೆಕೆಯ ಜೀವವನ್ನು
ಅನುಕರಿಸುವ ನಡೆಯನ್ನು
ಒಲವನ್ನು ಬಲವನ್ನು
ಸೆಲೆಯನ್ನು ಬಲೆಯನ್ನು
ಕರೆಯನ್ನು ಮೊರೆಯನ್ನು
ಜತನವಾಗಿಟ್ಟುಕೋ
ಇದಿಷ್ಟನೂ…!!
ನಾನು ಬರುವವರೆಗೂ..
ನಾ ನಿನ್ನಲ್ಲಿ
ನೆಲೆಯಾಗುವವರೆಗೂ..
ಅಲ್ಲೊಂದು ದೀಪ ಉರಿಯುತ್ತಿರಲಿ
ನನ್ನಂತೆ…!!
ಅನಸೂಯ ಜಹಗೀರದಾರ
About The Author
ಕವಿತೆ ಚೆನ್ನಾಗಿದೆ.ಅಭಿನಂದನೆಗಳು ಮೇಡಂ.
ಧನ್ಯವಾದಗಳು ಸರ್.