ಅನುವಾದ ಸಂಗಾತಿ
ನನ್ನ ಪ್ರೀತಿಯ ಕಮಲಿ
ಮೂಲ:Oh! Once I loved a bonny lass by:Robert Burns
ಕನ್ನಡಕ್ಕೆ: ಗಣೇಶ್ ವಿ.
ಚೆಲುವೆಯೊಬ್ಬಳನು ಅಂದು ನಾ ಪ್ರೀತಿಸಿದೆ
ಈಗಲೂ ಅವಳನ್ನು ಪ್ರೀತಿಸುತಲೇ ಇರುವೆ
ಮನದೊಳಗೆ ನೆಲಸಿಹುದು ಅವಳ ಚೆಲುವು
ಅದನೆ ಪ್ರೀತಿಸುತ ನಾ ದಿನ ದೂಡುತಲಿರುವೆ
ನಾ ಕಂಡ ಚೆಲುವೆಯರು ನೂರಾರು ಮಂದಿ
ಮೈತುಂಬ ಆಭರಣ ತೊಟ್ಟು ನಲಿಯುವವರು
ಕಮಲಿಯಂತಹ ಸುಂದರಿಯರ ನಾನೆಲ್ಲು ಕಾಣೆ
ಇದುವರೆಗು ನನಗಂತವರು ಬೇರೆಲ್ಲಿ ಸಿಗಲಿಲ್ಲ
ಅವಳ ಮೀರಿಪ ಚೆಲುವೆಯೂ ಬೇರಿರಬಹುದು
ಒಮ್ಮೆ ನೋಡಿದರೆ ಮತ್ತೆ ನೋಡಬೇಕೆನಿಸಬಹುದು
ಅವಳ ಗುಣವ ಮೀರಿಪ ಗುಣವಂತರಿರರಾರಿಲ್ಲ
ನಾನವಳ ಗುಣಕಾಗಿ ಮನತುಂಬಿ ಪ್ರೀತಿಸುವೆ
ಅವಳ ಆ ಕುಡಿನೋಟವೇ ನನ್ನ ಜೀವದುಸಿರು
ಅದಕಿಂತ ಮಿಗಿಲಾದ ನೋಟ ಇರಲೂಬಹುದು
ಅವಳ ಮನಸಿನಲಂತೂ ನಾನೆ ತುಂಬಿರುವೆ
ನಿಷ್ಕಲ್ಮಷವಾದ ಆ ಮನವೆ ನನಗೆ ಮೆಚ್ಚುಗೆ
ಅವಳ ಉಡುಗೆ ತೊಡುಗೆಗಳೋ ಅಚ್ಚುಕಟ್ಟು
ಉಡುಗೆಯಲೆ ಕಾಣುವುದು ಆ ಶುದ್ಧಮನವದು
ಅವಳ ನಡೆ ನುಡಿಗಳೆರಡೂ ಜೇನಿನಂತಹ ಸವಿ
ಅವಳಿಂದ ಆ ಉಡುಗೆಗೇ ಬೆಳಕು ಬರುವುದು
ಈ ಎಲ್ಲಾ ಗುಣಗಳ ಕಮಲಿಯಲಿ ಕಂಡಿರುವೆ
ಅದಕೆ ಅವಳು ನನ್ನ ಪ್ರಾಣದ ಸಖಿಯಾಗಿಹಳು
ಅದಕಾಗಿ ನಿಜದಲ್ಲಿ ಅವಳು ನನ ಹೃದಯದಲಿ
ಮೆರೆದಾಡುತಿರುವಳು ಅನುದಿನವು ಬಿಡದೆಯೆ
