ಗಜ಼ಲ್

ರಾಹುಲ ಮರಳಿ

ನಿನ್ನ ನೋಟದಿ ನಶೆಯ ಅನುಭವಿಸುತಿರಲು ಮದಿರೆ ಬೇಕಾ ಸಖಿ
ಮಧುಬಟ್ಟಲಿನ ಸುಖವು ನಿನ್ನ‌ ಅಧರದಲಿರಲು ಮದಿರೆ ಬೇಕಾ ಸಖಿ

ಹುಣ್ಣಿಮೆ ಚಂದಿರನಂತೆ ಹೊಳೆವ ನಿನ್ನ ಸುಂದರ ಮೊಗವು ಕಣ್ಮುಂದಿದೆ
ಏಕಾಂತದ ತಂಪಾದ ಹೊತ್ತಲಿ ನಿನ್ನೊಟ್ಟಿಗಿರಲು ಮದಿರೆ ಬೇಕಾ ಸಖಿ

ಎರಡು ಕಾಮನ ಬಿಲ್ಲಿನ ನಡುವಿನ ನಾಸಿಕವು ಸಂಪಿಗೆಯಂತಿದೆ
ರತ್ನದ ಮೂಗುತಿ ನಿನ್ನತ್ತ ಆಕರ್ಷಿಸುತ್ತಿರಲು ಮದಿರೆ ಬೇಕಾ‌ ಸಖಿ

ಶಂಖುವಿನಂತಹ ಸುಂದರ ಕರ್ಣಗಳಲಿ ಓಲೆ ನಲಿದಾಡುತಿದೆ
ಮನದ ಆಲಾಪನೆ ಕೇಳುವ ಕರ್ಣಗಳಿರಲು ಮದಿರೆ‌ ಬೇಕಾ ಸಖಿ

ನಕ್ಷತ್ರದ ಹೊಳಪಿನಂತೆ ಹೊಳೆಯುವ ನಿನ್ನ ಅಕ್ಷಿಗಳ ತುಂಟಾಟ
ಹುದುಗಿದ ಮನ್ಮಥನ ಗುಣವ ಕೆರಳಿಸುತಿರಲು ಮದಿರೆ ಬೇಕಾ ಸಖಿ

ಇಬ್ಬರ ಬೆರಳುಗಳು ಬೆಸೆದು ಭಾವನೆಗಳ ಬಂಧ ಹೆಚ್ಚಿಸುತಿವೆ
ಪ್ರಿಯತಮೆಯು ಮೈಮನವ ಅರ್ಪಿಸುತಿರಲು ಮದಿರೆ ಬೇಕಾ ಸಖಿ

ಯೌವನದ ಶಾಖ ‘ಜೀವಕವಿಯ’ ರೋಮಗಳನೂ ರಂಗೇರಿಸುತಿದೆ
ಮನದ ಕಾಮನೆ ಪೂರೈಸುವ ರತಿ ಜೊತೆಗಿರಲು ಮದಿರೆ ಬೇಕಾ ಸಖಿ

*************************

About The Author

admin

See author's posts