ನಾಮ

ನಾಮ

ನಾಗೇಶ ಮೈಸೂರು

ನಿನ್ನ ನಾಮ ನನ್ನ ನಾಮ
ಕರಗಿ ಹೋದ ಚರಿತೆ
ಯಾಕೊ ಕಾಣೆನಲ್ಲ ಶಾಮ
ಮರೆಯಲಿಲ್ಲ ಜನತೆ ||

ನಾನು ನೀನು ಸೇರಲಿಲ್ಲ
ಸೇರಿ ಕಳೆದ ಹೊತ್ತು
ಇನಿತೆ ಇದ್ದರೇನು ಎಲ್ಲ
ನೆನೆಯುತದನೆ ಸುತ್ತು ||

ನಿನ್ನ ಮುರಳಿ ಹಾಡಿತಿಷ್ಟೆ
ಕೊಟ್ಟು ಹೋದೆ ನನಗೆ
ಹಾಡುತಿಹರು ಅಷ್ಟನಷ್ಟೆ
ಮರಳಿ ನುಡಿಸೊ ಬೆರಗೆ ||

ನಾನು ಸಹಜ ನೀನು ಸಹಜ
ಇರಲೆ ಇಲ್ಲ ಬೆಡಗು
ಬೆರೆತ ಬಾಳಲಿಲ್ಲ ಸಹಜ
ಹೇಳಲೊಂದು ಕೊರಗು ||

ನಾಮದಲ್ಲೆ ಕೋಟಿ ಧಾಮ
ಕಂಡುಕೊಂಡೆ ಖಾಸ
ಸುತ್ತಿ ಪರಿಧಿ ಅದದೆ ತಾಣ
ಬಿಂದು ದೂರ ವ್ಯಾಸ ||

*****************