ಕಾವ್ಯಯಾನ
ಭಾವ ಒಡಲು..
ಪ್ರೊ ವಿಜಯಲಕ್ಷ್ಮಿ ಪುಟ್ಟಿ
ಕೆಲದಿನಗಳಿಂದ ಮುನಿಸು
ಅದೇನು ಗೊತ್ತಿಲ್ಲದೆ ಮೈತುಂಬಿಕೊಂಡ ತುಸು ಹಠ
ಮಾತು ಮಾತಿನಲ್ಲಿ
ನನ್ನ ಸಿಡಿಮಿಡಿ
ಅದಕುತ್ತರವೆಂಬಂತೆ
ನಿನ್ನ ಮಾತು ಕಿಡಿಕಿಡಿ
ಮೈ ಮನಸುಗಳು
ದೂರ ದೂರ
ಹೆಜ್ಜೆಹೆಜ್ಜೆಗೂ ಭಾರ
ನಿನ್ನ ಕರ್ತವ್ಯ
ಗೆಳೆಯ ಗೆಳತಿಯರು
ದಿನಚರಿ ಕಷ್ಟ ಸುಖ
ಫೋನ್ ಕಾಲುಗಳು
ನಿನ್ನ ಪ್ರಪಂಚದಲ್ಲಿ
ಸದಾ ನೀ ತಲ್ಲೀನ
ನನ್ನ ಪ್ರಪಂಚದಲ್ಲಿ ನಾನು
ಬೇಕೆಂತಲೇ ತನ್ಮಯ
ಅದೊಮ್ಮೆ ನೀನು
ಮುರಿದೆ ಮೌನ
ಹತ್ತಿರ ಕರೆದೆ
ಬರಲೇ ಬೇಡವೋ
ಎಂಬಂತೆ ನಿನ್ನತ್ತ ನಾ ಸರಿದೆ
ಪ್ರೀತಿಸ್ಪರ್ಶ ಮೈದುಂಬಿ
ಭಾವಗಳು ಜೇಂಕರಿಸಿ
ಮನ ನಿನಗಾಗಿ ಮೀಟಿ
ಹೆಪ್ಪುಗಟ್ಟಿದ ಕೋಪ
ಕ್ಷಣಮಾತ್ರದಲ್ಲಿ ಸಡಿಲ
ನಿಧಾನವಾಗಿ ಹರಿದ ಭಾವ
ಮೈಮನವನ್ನೆಲ್ಲ ವ್ಯಾಪಿಸಿ
ಆವರಿಸಿ ಭೋರ್ಗರೆದು
ನಿನ್ನ ಪಕ್ಕದಲ್ಲಿ
ಇದೀಗ ನಾ
ಶಾಂತ ಕಡಲು
ಪ್ರೀತಿ ತುಂಬಿದ
ಭಾವ ಒಡಲು..
***************
About The Author
