ಕಾವ್ಯಯಾನ
ಅಡಿಗೆಯವಳ ಮಗಳು
ಸಂಧ್ಯಾ ನಾಯ್ಕ ಅಘನಾಶಿನಿ
ಬೇಯಿಸಿ ಬಡಿಸುವುದನ್ನೇ
ಬದುಕಾಗಿಸಿಕೊಂಡವಳ
ಮಗಳು
ಬರೀ ಅಡಿಗೆ ಮಾಡುವುದನ್ನು
ಮಾತ್ರ ಆಟವಾಡುತ್ತಿದ್ದಳು
ದೊಡ್ಡ ದೊಡ್ಡ ಬೊಂಬೆಗಳನ್ನು ಕುಣಿಸುವವರ ನಡುವೆ
ಇವಳೊಂದು ಚಿಕ್ಕ
ಗೆಜ್ಜೆಯನ್ನಾದರೂ ಕಟ್ಟಿ
ಕುಣಿಯಲೆಂದು ಎಣಿಸಿದವಳೇ
ಒಂದು ಸಂಜೆ
ಪುಟಾಣಿ ಕನಸುಗಳನ್ನು
ಕೊಟ್ಟು ಬಂದೆ ನಾನು
ಬೆಳಗ್ಗೆ ಹೋಗಿ ನೋಡಿದರೆ
ಅದನ್ನೂ
ಬಡಿಸಲೆಂದೇ ಹುರಿದುಬಿಟ್ಟಿದ್ದಳು
ಅವಳಿಗೆ ಕಲಿಸಿದ
ಅಕ್ಷರಗಳೂ ಅನ್ನವಾಗುವ
ಪರಿ ಕಂಡು
ಅಚ್ಚರಿಗೊಂಡ ನಾನೀಗ
ನನ್ನ ಭ್ರಮೆಗಳನ್ನು
ಅವಳ ತಲೆಗೆ ತುರುಕುವುದ ಬಿಟ್ಟೇ
ಬಿಟ್ಟಿದ್ದೇನೆ
*********************
Wow teacher wow
ಇದು ಕವಿತೆ ಅಂದ್ರೆ ಇದು ನಿಮ್ಮ ನಿಜ ಅನುಭವ ತರ ಇದೆ ಕಣ್ಣಿಗೆ ಕಟ್ಟು ತರ ಇದೆ ….ಮಾರ್ಮಿಕ ..
ಥ್ಯಾಂಕ್ಯೂ
ಅಕ್ಕಾ ಅದ್ಭುತ ಕವಿತೆ. ನಿಜಕ್ಕೂ ಹಲವು ಕವಿತೆ ಹುಟ್ಟಲು ನಿಮ್ಮ ಈ ಒಂದು ಕವಿತೆ ಸಾಕು.. ಸೊಗಸಾಗಿದೆ..
ಥ್ಯಾಂಕ್ಯೂ ಅಪ್ಪಿ
ಕಥಾ ವಸ್ತುವನ್ನು ಕವಿತೆಯಾಗಿಸಿ ಬರೆದ ಶೈಲಿ ಉತ್ತಮವಾಗಿದೆ
ಅನುಭವಕ್ಕಿಂತ ಅಮೋಘವಾದ ಪದಗಳು ಬೇರೆಲ್ಲೂ ಬಣ್ಣಿಸಲಾಗದು .ಅದ್ಭುತ ಸಾಲುಗಳು.
ಚಂದದ ಕವಿತೆ.