ಗಜಲ್

ಗಜಲ್

ಎ. ಹೇಮಗಂಗಾ

ಉಚ್ಛ್ವಾಸ ನಿಶ್ವಾಸದಲಿ ಉಸಿರು ಉಸುರುವುದು ನಿನ್ನ ಹೆಸರನ್ನೇ
ತುಡಿತ ಮಿಡಿತದಲಿ ಹೃದಯ ನಿತ್ಯ ಕರೆವುದು ನಿನ್ನ ಹೆಸರನ್ನೇ

ಕಡಲದಂಡೆಯ ಮರಳಲಿ ಜೊತೆಯಾದ ಹೆಜ್ಜೆ ಗುರುತುಗಳು
ಸೋತರೂ ಬೆರಳು ಮತ್ತೆ ಮತ್ತೆ ಬರೆವುದು ನಿನ್ನ ಹೆಸರನ್ನೇ

ಕಾಯುವಿಕೆಯ ಕಾಯಕದಲೂ ಹಿತವಾದ ವೇದನೆಯಿದೆ
ಸಿಹಿಚುಂಬನಕೆ ಅಧರ ಕನವರಿಸುವುದು ನಿನ್ನ ಹೆಸರನ್ನೇ

ನೀರವ ಒಂಟಿ ಇರುಳಲಿ ಕುಳಿತರೂ ನಿಂತರೂ ನಿನ್ನದೇ ಧ್ಯಾನ
ಮೈ ನೇವರಿಸಿ ಕುಳಿರ್ಗಾಳಿ ನೆನಪಿಸುವುದು ನಿನ್ನ ಹೆಸರನ್ನೇ

ವಿರಹದ ರಾಗಾಲಾಪ ಹಕ್ಕಿಯ ಹಾಡಿನಲಿ ಕಾಡುವುದೇಕೆ ?
ಒಲವ ತೆಕ್ಕೆಯಲಿ ಸುಖಿಸಲು ಮನ ಹೇಳುವುದು ನಿನ್ನ ಹೆಸರನ್ನೇ

ಪ್ರೇಮದ ಈ ಪರಿ ನಶೆಯಲಿ ಕಳೆದುಹೋಗಿಹಳು ಹೇಮ
ಜನುಮಗಳ ಬಂಧದಲಿ ಆತ್ಮ ಜಪಿಸುವುದು ನಿನ್ನ ಹೆಸರನ್ನೇ

***********************************