ಕವಿತೆ
ಬಾಗಿಲನ್ನು ತೆರೆದಿಡಿ
ವಿಶ್ವನಾಥ ಎನ್ ನೇರಳಕಟ್ಟೆ
ಬಾಗಿಲನ್ನು ತೆರೆದಿಡಿ
ತುಸು ಗಾಳಿಯಾಡಲಿ
ಬರಿಯ ಕಿಟಕಿ
ಸಾಲುವುದಿಲ್ಲ ಈ ಕಾಲಕ್ಕೆ
ಎದೆಯುರಿಯ ಆರುವಿಕೆಗೆ
ಹಿರಿದು ಗಾಳಿಯ ಸಹಕಾರವಿರಲಿ
ಬಿಸಿಲ ಝಳಕ್ಕೆ ಬಳಲಿದ ಪಕ್ಷಿಗಳು
ಬರಲಿ ಒಳಕ್ಕೆ
ವಿರಮಿಸಲಿ ತುಸು ಹೊತ್ತು
ಪ್ರಣಯನಾದದ ಕೇಕೆ
ಅನುರಣಿಸಲಿ ಭಿತ್ತಿಗಳಲಿ
ಮನೆಯೊಳಗೆ ಮುತ್ತಿರುವ ಕತ್ತಲು
ಕಣಕಣವಾಗಿ ಕಡಿದುಹೋಗಲಿ
ಹೊರಗಿನ ಬೆಳಕಿನಲ್ಲಿ
ಕಣ್ಣ ದೃಷ್ಟಿ ಸೂಕ್ಷ್ಮವಾಗಲಿ
ಬಾಗಿಲನ್ನು ತೆರೆದಿಡಿ
ಎದೆಯ ಕವಾಟಗಳಲ್ಲಿ
ಸಾಮರಸ್ಯದ ಗಾಳಿಯಾಡಲಿ
