ಕವಿತೆ
ನಾವು ಮತ್ತು ಅವರು
ರೇಶ್ಮಾ ಗುಳೇದಗುಡ್ಡಾಕರ್
ಇಳೆಯಿದು ಬುದ್ದನು
ಬದುಕಿ ಬಾಳಿದ ಬೆಳಕಿರುವದು
ಭುವಿಯಿದು ಅಲ್ಲಮನ
ಬಯಲಿಗೆ ಬೆರಗಾದ ತಾಣವಿದು
ಧರಣಿಯಿದು ಅಣ್ಣ ಬಸವಣ್ಣನ
ಕ್ರಾಂತಿಗೆ ಸಾಕ್ಷಿಯಾದ ನೆಲವಿದು
ಭಾರತವಿದು ಗಾಂಧಿಯ
ಅಹಿಂಸೆಯ ಒಲುಮೆಯಲಿ
ಮಿಂದೆದ್ದ ಸತ್ಯವಿದು
ಕತ್ತಿಯ ಅಂಚಿಗೆ ಬಲಿಯಾಗುವವೆ
ಇವರೆಲ್ಲ ಮಾರ್ಗಗಳು ?
ಉಳಿದಿಲ್ಲವೆ ಅಥವಾ ಉಳಿಸುವದು
ಬೇಡವೇ ನೆಮ್ಮದಿಯ ನಾಳೆಗಳನು?
ಹಸಿದ ಒಡಲಿಗೆ ದ್ವೇಷ
ಅನ್ನ ನೀಡುವದೇ?
ಸ್ನೇಹ ಬೆಸೆಯುವದೇ?
ಬಾಳಿಗೆ ಹೆಗಲಾಗುವದೇ?
ಸಾಮರಸ್ಯ ಅಲೆ ಇಲ್ಲದ
ಸೌಹಾರ್ದದತೆಯ ಕಡಲು ಇರುವುದೇ?
ಸಂಕೋಲೆಗಳ ಕಿತ್ತೊಸೆದು
ಸಂಬಂಧಗಳ ಹೊಸೆದು
ನಡೆಯುವ ಬನ್ನಿರಿ
ನಮ್ಮ ಗಳ ದಾರಿಗೆ ನಾವೇ
ಮುಳ್ಳಾಗಿ ಭಾವನೆಗಳು
ಕೃಷವಾಗಿ ಜೀವಿಸುವದು ಬೇಕೆ?
*******************************************
