ಬರೆದ ಸಾಲುಗಳು

ಕವಿತೆ

ಬರೆದ ಸಾಲುಗಳು

ಬೆಂಶ್ರೀ ರವೀಂದ್ರ

ಬರೆದ ಸಾಲುಗಳಲಿ ರಕ್ತ ಚಿಮ್ಮಲಿಲ್ಲ
ಯಾಕೆಂದರೆ ಲೇಖನಿ ಭರ್ಚಿಯಾಗಿರಲಿಲ್ಲ

ಬರೆದ ಸಾಲುಗಳಲಿ ಜೇನು‌ಜಿನುಗಲಿಲ್ಲ
ಯಾಕೆಂದರೆ ಲೇಖನಿ ಜೇನುಗೂಡಾಗಿರಲಿಲ್ಲ

ಬರೆದ ಸಾಲುಗಳಲಿ ಕ್ಷಾರ ಕದಡಲಿಲ್ಲ
ಯಾಕೆಂದರೆ ಲೇಖನಿ ಕಡಲಾಗಿರಲಿಲ್ಲ

ಬರೆದ ಸಾಲುಗಳಲಿ ಕಾವು ಸುಡಲಿಲ್ಲ
ಯಾಕೆಂದರೆ ಲೇಖನಿ ಬೆಂಕಿಯಾಗಿರಲಿಲ್ಲ

ಬರೆದ ಸಾಲುಗಳಲಿ ತಂಪು ಹೆಪ್ಪುಗಟ್ಟಲಿಲ್ಲ
ಯಾಕೆಂದರೆ ಲೇಖನಿ ಶಶಿಯಾಗಿರಲಿಲ್ಲ

ಬರೆದ ಸಾಲುಗಳಲಿ ಕತ್ತಲು ಕವಿಯಲಿಲ್ಲ
ಯಾಕೆಂದರೆ ಲೇಖನಿ ಅಮಾವಾಸ್ಯೆಯಾಗಿರಲಿಲ್ಲ

ಬರೆದ ಸಾಲುಗಳಲಿ ಬೆಳಕು ಕುಕ್ಕಲಿಲ್ಲ
ಯಾಕೆಂದರೆ ಲೇಖನಿ ಭಾನುವಾಗಿರಲಿಲ್ಲ

ಬರೆದ ಸಾಲುಗಳಲಿ ಕರುಳು ಮಿಡಿಯಲಿಲ್ಲ
ಯಾಕೆಂದರೆ ಲೇಖನಿ ಹೆಣ್ಣಾಗಿರಲಿಲ್ಲ

ಬರೆದ ಸಾಲುಗಳಲಿ ಬಯಕೆ ಸೆಳೆಯಲಿಲ್ಲ
ಯಾಕೆಂದರೆ ಲೇಖನಿ ಗಂಡಾಗಿರಲಿಲ್ಲ

ಬರೆದ ಸಾಲುಗಳಲಿ ಚಿಗುರು ಒಡೆಯಲಿಲ್ಲ
ಯಾಕೆಂದರೆ ಲೇಖನಿ ಇಳೆಯಾಗಿರಲಿಲ್ಲ

ಬರೆದ ಸಾಲುಗಳಲಿ ಅಕ್ಷರವಿತ್ತು
ಯಾಕೆಂದರೆ ಲೇಖನಿ ಲೇಖನಿಯಾಗಿತ್ತು.

***************************************