ಕವಿತೆ
ನಸುಕಿನ ತುಂತುರು
ಸ್ಮಿತಾ ಶ್ಯಾಮ
ತುಂತುರು ಹನಿಗಳ ಮುಂಜಾನೆಯ ಮಳೆ
ಸರಿಗಮ ಪದನಿಸ ಹಾಡುತಿದೆ
ಸಪ್ತ ಸ್ವರಗಳ ಸಂಗಮದಲಿ ತೇಲಿದೆ
ಹಸಿರನುಟ್ಟು ಕಂಗೊಳಿಸುತಿಹ ವಸುಧೆ || ಪ||
ಹಕ್ಕಿಗಳಿಂಚರದಿ ಬೆರೆತಿದೆ ಮಳೆಗಾನ
ಹೊಮ್ಮುತಲಿದೆ ಹೊಂಬೆಳಕಿನ ರವಿ ಕಿರಣ
ಪರಿಮಳವನು ಸೂಸುತಲಿವೆ ಹೂಬನ
ಪ್ರಕೃತಿಯ ಸೊಬಗದು ರೋಮಾಂಚನ. ||೧||
ಮುಂಜಾನೆಯ ಮಳೆಯ ಸಿಂಚನ
ತನನ ತನನ ನವಿಲ ನರ್ತನ
ಸಾಗರದ ದಡಕೆ ಅಲೆಯ ಚುಂಬನ
ತಂಪು ಸೂಸುತ ಹಾಯ್ವ ಪವನ. ||೨||
ಸುಪ್ರಭಾತ ಹಾಡುತಲಿದೆ ಪ್ರಾತಃಕಾಲದಿ ವರ್ಷವು
ಗುಡಿಗೋಪುರಕದುವೆ ನಸುಕಿನ ಅಭಿಷೇಕವು
ಶುಭ್ರಗೊಂಡಿಹುದು ಮನೆ ಮನೆಯ ಅಂಗಳವು
ತನುಮನವನು ತುಂಬುತಲಿದೆ ನವೋಲ್ಲಾಸ ಚೇತನವು||೩||
*********************************
