ಕವಿತೆ
ಶಬ್ದಗಳ ಸಂತೆಯಲ್ಲಿ.
ವೀಣಾ ನಿರಂಜನ್
ಇಂದು
ಶಬ್ದಗಳು ಅರ್ಥದ ಒಜ್ಜೆ ತಾಳಲಾರದೆ
ನನ್ನ ಮನೆಯ ಬಾಗಿಲಿಗೆ ಬಂದು ನಿಂತಿವೆ
ನಾನೀಗ
ಅವುಗಳಿಗೆ ಸರಳವಾದ ಉಡುಪು ತೊಡಿಸಿ
ಮತ್ತೆ ಮರಳಿ ಕಳುಹಿಸಬೇಕಾಗಿ ಬಂದಿದೆ.
**
ಸುಳ್ಳು ಸಂಚರಿಸುವಾಗ
ಶಬ್ದಗಳ ಜಾತ್ರೆಯೇ ನೆರೆದಿರುತ್ತದೆ
ಸತ್ಯ ಹೊರಗಡಿಯಿಡುವಾಗ
ಮೌನದ ಮೆರವಣಿಗೆ ನಡೆಯುತ್ತದೆ
**
ಶಬ್ದಗಳು ನಾಚಿದಾಗ
ಮೌನ ಮಾತಾಡುತ್ತದೆ
ಶಬ್ದಗಳು ಬಿಂಕ ತೋರಿದಾಗ
ಮೌನ ನಾಚುತ್ತದೆ
**
ಅಕ್ಷರಗಳ ಹೆತ್ತದಕ್ಕೆ
ಪದಗಳಿಗೆ ಬೆರಗಾಗಿತ್ತು
ಪದಗಳ ಬವಣೆಗೆ
ಅಕ್ಷರಗಳೇ ಸಾಕ್ಷಿಯಾಗಿದ್ದವು.
**********************************
About The Author
