ಕಾವ್ಯ ಸಂಗಾತಿ
“ದೋಷಿ ನಾನಲ್ಲ”
ಮಾಳೇಟಿರ ಸೀತಮ್ಮ ವಿವೇಕ್
ಸ್ಪರ್ಧೆ ಎನಿಸಿದರೆ ನಿಮಗೆನ್ನ
ಕಾಯಕವದರ ದೋಷಿಯು ನಾನಲ್ಲ||
ಕೆರೆಯುತಲಿದ್ದು ಮಾಯುವುದಕ್ಕೆಡೆ ಕೊಡದೆ ನಂಜಾಗುತಿರೆ ಗಾಯ ದೋಷಿಯು ನಾನಲ್ಲ||
ನಾನಾಡುವ ದಿಟ ಮಾತು ಸದಾ
ಕಟುವೆನಿಸಿದರಕೆ ದೋಷಿಯು ನಾನಲ್ಲ||
ನಾ ಬಲ್ಲೆ ಎನ್ನರಿವು ಹರಿವಿನ ಹಿತಮಿತ
ಅಹಂ ಅನಿಸಿದರದು ತಮಗೆ ದೋಷಿ ನಾನಲ್ಲ||
ಎನ್ನ ಬಾಹ್ಯ-ಆಂತರ್ಯ ಸೊಬಗಿಗೆ ನಿಮ್ಮ
ಕಣ್ಗಳು ಸೋಲುಂಬುದಕೆ ದೋಷಿಯು ನಾನಲ್ಲ||
ಮುನ್ನ ಕೃತಿ ಪ್ರೌಢಿಮೆಯ ಆಳವರಿಯದೆ
ವರ್ಜಿಸಿ ಕಳೆದುಕೊಳ್ಳುವುದಕೆ ದೋಷಿಯು ನಾನಲ್ಲ||
ಎನ್ನಾತ್ಮ ಮೆಚ್ಚುವಂತೆ ಮಾಡುವ ಕೆಲಸ
ನಿಮ್ಮ ಕಾಡಿದರದರ ದೋಷಿಯು ನಾನಲ್ಲ||
ಬೆನ್ನಂತೆ ಕಾಣದಿರುವ ನಿಮ್ಮ ಗುಣವ ನೀವೆ ತಿಳಿಯದಿರುವುದಕೆ ದೋಷಿಯು ನಾನಲ್ಲ||
ಆವುದನ್ನು ತಲೆಗೇರಿಸಿಕೊಳ್ಳದೆ ಇಷ್ಟದೊಂದಿಗೆ ಬಾಳುತಿರುವ ಅಂತರ್ಧ್ಯಾನಿ ನನಗಾವ ದೋಷವಿಲ್ಲ||
ಆಕರ್ಷ ಜಗಕೆ ಮರುಳಾಗುತಿರುವ ಮೋಹಿ ನೀ ನಿನ್ನ ಅರಿಯದಕೆ ಅನಿಸುತ್ತಿದೆ ನಿಮಗೆ ದೋಷವೇ ಎಲ್ಲ ||
ಕೊ//ಮಾಳೇಟಿರ ಸೀತಮ್ಮ ವಿವೇಕ್, ಹಾಸನ.
About The Author
