ಲೀಲಾಕುಮಾರಿ ತೊಡಿಕಾನ ಅವರ ಕವಿತೆ-ದಳ್ಳುರಿ - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಕಾವ್ಯ ಸಂಗಾತಿ

ಲೀಲಾಕುಮಾರಿ ತೊಡಿಕಾನ

ದಳ್ಳುರಿ

ಎಲ್ಲೆಲ್ಲೂ..ರಣಹದ್ದುಗಳ ಹಾರಾಟ
ಕೊಳೆ ಕೊಳೆತು ನಾರುವ ದುರ್ನಾತದ ಮಧ್ಯೆ
ಮುಗ್ಧರ ಹೆಣ ಹುಡುಕುತ್ತಾ..
ರೆಕ್ಕೆ ಬಡಿವ ಸದ್ದಿಗೆ ತೊಟ್ಟಿಲ ಮಗು
ಬೆಚ್ಚಿ ಬೀಳುತ್ತಿದೆ ತಾಯಿಯಿದ್ದರೂ..

ಮೊದ ಮೊದಲು ಬೆಚ್ಚಿದ
ಮಗುವಿಗೀಗ –
ರೆಕ್ಕೆ ಬಡಿತದ ಸದ್ದೇ ತೂಗುವ ಜೋಗುಳ!

ನೋಡಿ ಕಿಟಾರನೆ ಕಿರುಚಿದ
ಕ್ರೌರ್ಯದ ರಕ್ತ
ಮಗುವಿಗೀಗ ಮೆತ್ತಿಕೊಳ್ಳುವ ಬಣ್ಣ!
ಕಣ್ಣು ಹೊರಳಿದರೆ
ಕಾಣುವುದೆಲ್ಲ ಕೆಂಪು
ಕೈಯಲ್ಲಿದ್ದ ಲೇಖನಿ ಆಯುಧಗಳಾಗಿವೆ
ವ್ಯವಸ್ಥೆಯ ಕ್ರೌರ್ಯದಿ ಮನಸ್ಸು ಮಾಗಿ!