ಮಕ್ಕಳ ಕವಿತೆ
ಈರಪ್ಪ ಬಿಜಲಿಯವರ ಮಕ್ಕಳ ಪದ್ಯ-
ಬಿಡಿಸೋಣ ಬಾ ಗಾಂಧಿ ಚಿತ್ರ
ಬಾರೊ ಭೀಮ ಬಾರೊ ಶಾಮ
ಚಿತ್ರವನ್ನು ಬಿಡಿಸೋಣ
ತಾರೊ ಬಿಳಿಯ ಹಾಳೆ ಸನಿಹ
ಗಾಂಧಿ ಚಿತ್ರ ಬಿಡಿಸೋಣ ||
ಗಾಂಧಿ ಅಂದ್ರೆ ಯಾವ ಗಾಂಧಿ
ರಂಗ ಹೇಳೊ ನೀ ಬೇಗ
ಗಾಂಧಿ ಅಂದ್ರೆ ಮೋಹನ್ ದಾಸ
ಕರಮ ಚಂದ್ರ ಗಾಂಧೀಜಿ||
ಮೂಗ ಮೇಲೆ ದುಂಡು ಚಸ್ಮಾ
ಕರದಿ ಉದ್ದ ಕೋಲಣ್ಣ
ನಗುವ ವದನ ತುಂಬು ಗಗನ
ಬಿಳಿಯ ವಸ್ತ್ರ ನೋಡಣ್ಣ ||
ನಮ್ಮ ದೇಶದ ಪರಮ ಪುರುಷ
ಶ್ರೀ ಮಹಾತ್ಮ ಗಾಂಧೀಜಿ
ವರ್ಣಬೇಧ ನೀಗಿದಂಥ
ರಾಷ್ಟ್ರಪಿತರು ಬಾಪೂಜಿ ||
ರಂಗ ಮಿತ್ರ ನಿನ್ನ ಉತ್ರ
ಕೇಳಿ ಹೃದಯ ತಂಪಾತು
ಈಗ್ಲೆ ಬಿಡಿಸಿ ಬಿಡುವ ಆಸೆ
ಮನದಿ ಪುಟಿದು ಹೆಚ್ಚಾಯ್ತು ||
ಈರಪ್ಪ ಬಿಜಲಿ
About The Author
