ಕಾವ್ಯ ಸಂಗಾತಿ
ಹಮೀದಾ ಬೇಗಂ ದೇಸಾಯಿ-
ಯಾರಿಗೆ ಹೇಳಲಿ…?
ಹಸಿದವರ ಕೈ ತುತ್ತು
ಕಸಿಯುವವರ ಬಲ್ಲೆ
ನೆರಳಿನ ಸೂರುಗಳನು
ತೂರಿ ಎಸೆಯುವವರ ಬಲ್ಲೆ ..
ಆದರೆ…
ಯಾರಿಗೆ ಹೇಗೆ ಹೇಳಲಿ ?
ಯಾರಿಗೆ ದೂರು ಕೊಡಲಿ ಇವೆಲ್ಲ ?
ರಕ್ಷಕರೇ ಭಕ್ಷಕರಾದಾಗ ,
ನೆರಳು ನೀಡಿದವರು
ಕೊರಳು ಕೊಯ್ವಾಗ ,
ನಯವಂಚಕ ತೋಳಗಳೆಲ್ಲ
ಎಂಜಲಿಗೆ ಕೈ ಚಾಚುವಾಗ….!
ಹಗಲು ಸವಲತ್ತುಗಳ ನೀಡಿ
ಕತ್ತಲೆಯಲಿ ಕಿತ್ತುಕೊಂಡಾಗ ,
ನಂಬಿಕೆಯ ಹಾರ ಹಾಕಿದವಗೇ
ನೇಣು ಬಿಗಿಯುವಾಗ ,
ತಾಯಂದಿರೇ ಎಂದುಲಿದು
ಕಳ್ಳ ಸಂಗಕ್ಕೆ ಜೊಲ್ಲು ಸುರಿಸಿದಾಗ…
ಯಾರಿಗೆ ಹೇಳಲಿ ನಾನು..?
ಸತ್ಯವಾಗಿಯೂ ನೀನಿರುವುದಾದರೆ ದೇವಾ
ತೆರೆ ಬೇಗ ನಿನ್ನ ಆ
ಬೆಂಕಿ ಕಾರುವ ಕೆಂಗಣ್ಣನು….!
ಹಮೀದಾ ಬೇಗಂ ದೇಸಾಯಿ
About The Author
