ಕಾವ್ಯ ಸಂಗಾತಿ
ಡಾ ಅನ್ನಪೂರ್ಣ ಹಿರೇಮಠ
ಭಾವಗೀತೆ
ಒಡಲಲಿ ಉರಿಯುವ ಬೆಂಕಿಯ ದಗೆಗೆ
ಮುತ್ತಿನ ಮಳೆ ಹಣಿ ನೀನಾಗು
ತನುವಲಿ ಸುಡುವ ಪ್ರೀತಿಯ ಕಿಚ್ಚಿಗೆ
ಪ್ರೇಮದ ತಂಗಾಳಿ ನೀನಾಗು//
ಮನದಲಿ ನಲಿಯದೆ ನಲುಗುತಿರುವ
ಆಸೆಗೆ ಆಸರೆಯು ನೀನಾಗು
ಹೃದಯದಿ ಹೊತ್ತಿದ ಪ್ರೀತಿಯ ಕಿಡಿಗೆ
ಪ್ರೇಮದ ನಂದಾದೀಪ ನೀನಾಗು//
ರಕುತದಿ ಬೆರೆತಿಹ ಪ್ರೀತಿಯ ನಶೆಗೆ
ಒಲವ ಮಂದಾರದ ನಗೆ ನೀನಾಗು
ನರನಾಡಿಗಳ ತಂತಿಗಳ ತುಡಿತಕೆ
ಸಂಗೀತ ಬೆರೆಸಿ ಹಾಡುವ ಗಾನವು ನೀನಾಗು//
ಉಸಿರಿನ ಬಿಸಿಯಲಿ ನರಳುತಲಿರುವ
ಭಾವಕೆ ಬಂಧುರದ ಪ್ರೇಮಗೀತೆ ನೀನಾಗು
ತನುಮನ ತಲ್ಲಣದಲಿ ಕಂಪಿಸುತ ಕೆಣಕುವ
ಆಸೆಗಳ ತನಿಸುವ ವೈಣಿಕನು ನೀನಾಗು//
ಒಲವದುರಿಯಲಿ ಉರಿವ ಜೀವಕೆ
ಜನುಮಜನುಮದ ಗೆಳೆಯನು ನೀನಾಗು
ನಲುಗುತಲಿರುವ ಮೃದು ಮಲ್ಲಿಗೆ ಬಳ್ಳಿಗೆ
ಆಸರೆಯ ಹಸುರಿನ ಮರವು ನೀನಾಗು//
ಡಾ ಅನ್ನಪೂರ್ಣ ಹಿರೇಮಠ
About The Author
ನಿಜವಾಗಿಯೂ ತಾವು ಒಳ್ಳೆ ಸಾಹಿತಿಗಳು ಕವಿತ್ರಿ ಕೂಡಾ ದನ್ಯವಾದಗಳು
ಸಾಹಿತ್ಯ ಸಿರಿ,,,, / ಬಹು ಭಾಷಾ ಕವಿತ್ರಿ