ಕಾವ್ಯ ಸಂಗಾತಿ
ಎ.ಎನ್.ರಮೇಶ್. ಗುಬ್ಬಿ.
ಬೆಳಕಿನ ದನಿಗಳು
- ಬಲಿದಾನ.!
ಹಣತೆಗೆ ಬೆಳಕು ಕೊಟ್ಟು
ಬೆಂಕಿಕಡ್ಡಿ ಜೀವ ಬಿಟ್ಟಿತು.!
- ನಂಟು.!
ಕನ್ನಡಿಯ ಕಂಗಳಿಗೆ
ದೀಪವೇ ಬೆಳಕು.!
- ಸಾರ್ಥ.!
ಬತ್ತಿ ತೈಲ ಸೇರಿ
ಹಡೆದವು ಬೆಳಕು
ಕೃತಾರ್ಥ ಬದುಕು.!
- ಸಂಘರ್ಷ.!
ಬೆಳಕನ್ನುಳಿಸಲು ಬತ್ತಿ-ತೈಲ
ಸತತ ಜೀವ ತೇಯುತ್ತಿದ್ದರೆ..
ಕತ್ತಲ ಸಂಸ್ಥಾಪಿಸಲು ಗಾಳಿ
ಸದಾ ಸಮಯ ಕಾಯುತ್ತಿತ್ತು.!
- ವಿನಂತಿ.!
ದೀಪದ ಬುಡದಲ್ಲಿನ
ಕತ್ತಲು ಹುಡುಕುವ ಬದಲು
ದೀಪದ ಶಿರದಲ್ಲಿನ
ಬೆಳಕಿಗೆ ತಲೆಬಾಗು ಮೊದಲು.!
- ಮೂಲ
ಬತ್ತಿ ತೈಲಗಳ ತ್ಯಾಗ
ಬಲಿದಾನಗಳಿಂದಲೇ
ಬೆಳಕಿಗೆ ಬದುಕು.!
- ಜೋಕೆ..!
ದೇಹ ಸುಡಲಿಕ್ಕೆ ಕಡ್ಡಿ
ಗೀರುವವರಿಗಿಂತಲೂ
ಜೀವಭಾವ ಉರಿಸಲಿಕ್ಕೆ
ಸದಾ ಬತ್ತಿ ಇಡುವವರು
ನಿತ್ಯ ಎಣ್ಣೆ ಸುರಿವವರು
ಗೆಳೆಯ ಕಂಗಳಿಗೆ ಅಪ್ಯಾಯ
ಬದುಕಿಗೆ ಬಲು ಅಪಾಯ.!
- ಫಲಿತಾಂಶ.!
ಎದೆಯಲಿ ತೈಲ ತುಂಬಿಕೊಂಡ
ಬತ್ತಿ ಬೆಳಗಿ ಬೆಳಕಾಯಿತು.!
ಶಿರದಿ ಸಿಡಿಮದ್ದು ತುಂಬಿಕೊಂಡ
ಬೆಂಕಿಕಡ್ಡಿ ಉರಿದು ಬೂದಿಯಾಯಿತು.!
- ದೀಪ..!
ದೀಪವೆಂದರೆ
ಅರಿತವರಿಗೆ ಬೆಳಕಿನ ನುಡಿ
ಸಹಸ್ರ ಸಂವೇದನೆ ಭಾವದಾಂಗುಡಿ
ಅರಿಯದವರಿಗೆ ಬರೀ ಬೆಂಕಿ ಕಿಡಿ.!
ಎ.ಎನ್.ರಮೇಶ್. ಗುಬ್ಬಿ.
About The Author
Very nice sir