ಕಾವ್ಯ ಸಂಗಾತಿ
ವಿಜಯಲಕ್ಷ್ಮಿ ಕೊಟಗಿ
ಗಜಲ್
ಕಣ್ಣಬಿತ್ತಿಯ ಚಿತ್ತಚೋರ ಚಿತ್ರಗೊಂಬೆಯಾದ ವನು ಮುಚ್ಚಲಾರೆ ಕಣ್ಣನು
ಮೂಡಿರುವದು ಬರಿ ಬಿಂಬವಲ್ಲ ನಜರ್ ಬಂಧಿಯಾದವನು ಮುಚ್ಚಲಾರೆ ಕಣ್ಣನು
ಪೌರ್ಣಿಮೆಯ ಬೆಳದಿಂಗಳಲ್ಲಿ ನಮ್ಮಿಬ್ಬರ ಚುಪಾಚುಪಿಯಾಟಕೆ ಶಶಿಯೇ ಸಾಕ್ಷಿ
ಕಣ್ಣಂಚಿನ ಮಿಂಚಿನಲ್ಲಿ ತೂರಿ ನಕ್ಷತ್ರವಾದವನು ಮುಚ್ಚಲಾರೆ ಕಣ್ಣನು
ಚಣವೂ ಕಣ್ಣೆವೆ ಕದಲಿಸೆನು ಕಾಪಿಟ್ಟ ಸಂಜ್ಞೆಗಳ ಗುಟ್ಟು ರಟ್ಟಾಗಬಹುದು
ಎದೆಗೂಡಿನ ಭಾವಹಕ್ಕಿಗೆ ಸದಾಕಾವಲಾದವನು ಮುಚ್ಚಲಾರೆ ಕಣ್ಣನು
ನಿದಿರೆಯ ಆಲಿಂಗನವಿಲ್ಲ ಹಗಲುಗನಸು ಗಳದೇ ಸಾಲು ಸಾಲು ಮೆರವಣಿಗೆ
ಗಾಳಿಗುದುರೆಯೇರಿದ ಚದುರ ಮನವ ನಾವರಿಸಿದವನು ಮುಚ್ಚಲಾರೆ ಕಣ್ಣನು
ನನ್ನದೇ ಅಕ್ಷಿಯ ಹೊಂಬೆಳಕ ಪಕ್ಷಿನೋಟದಿ ಕಂಗೊಳಿಸಿದ ಮದನಮೋಹನ
ನೆನಪುಗಳ ಮೂಟೆಯನೇ ಹೊತ್ತು ಮತ್ತೆ ಕನಸಾದವನು ಮುಚ್ಚಲಾರೆ ಕಣ್ಣನು
ಹರಿಯಗೊಡುವುದಿಲ್ಲ ಕೊಂಚವೂ ವಿರಹದಿ ನೊಂದಿರುವ ವಿಜಿಯ ಕಣ್ಣೀರಧಾರೆ
ಕೆನ್ನೆಗುಂಟ ಜಾರಿ ಕುಳಿಯಲಿ ಕರಗಿ ಬಣ್ಣವಾದವನು ಮುಚ್ಚಲಾರೆ ಕಣ್ಣನು.
About The Author
