ಕಾವ್ಯ ಸಂಗಾತಿ
ಗಜಲ್
ಮಾಜಾನ್ ಮಸ್ಕಿ
ತಂಬೆಳಕಿನ ತಂಪಿನಲಿ ನೀ ಮುಡಿಸಿದ ಮಲ್ಲಿಗೆ ಕಂಪಾಗುವುದು ಇನಿಯ
ನಿನ್ನ ಬಿಗಿದಪ್ಪಿದ ಬಾಹುಬಂಧನ ಮೆಲ್ಲಗೆ ಬಿಸಿಯಾಗುವುದು ಇನಿಯ
ಇರುಳು ಆಕಾಶಕ್ಕೆ ಚಾಂದನಿ ಬೆಳಕು ಚೆಲ್ಲಿಹುದು ಸದಾ ಹೊಸತನದಲ್ಲಿ
ಪ್ರೇಮಿಗಳ ಪ್ರೇಮ ಭಾವನೆ ಕೆರಳಿಸಿ ಮನ ನಲಿವಾಗುವುದು ಇನಿಯ
ನಿನ್ನ ಬರುವಿಕೆಯಲ್ಲಿ ಪೌರ್ಣಿಮೆಯ ದಿನಕ್ಕಾಗಿ ಕಾಯುತ್ತಿರುವೆ ಸಖಾ
ಕನಸೆಲ್ಲಾ ನನಸಾಗಿ ಶೃಂಗಾರ ರಾಸಲೀಲೆಯಲ್ಲಿ ಒಂದಾಗುವುದು ಇನಿಯ
ನಿನ್ನ ಸಂಪೂರ್ಣತೆಯು ನನ್ನದೇ ಇರಬೇಕೆಂಬ ಸ್ವಾರ್ಥಿ ನಾನು
ಅರ್ಧಚಂದ್ರ ಕದ್ದು ತಿಂದವರಾರು ನೋವಾಗುವುದು ಇನಿಯ
ಪ್ರತಿ ರಾತ್ರಿ ಫಳ ಫಳನೆ ಹೊಳೆಯುವ ನಕ್ಷತ್ರಗಳಿವೆ “ಮಾಜಾ”
ಬಯಕೆಗಳ ಪ್ರೀತಿಯ ನಿರೀಕ್ಷೆಯ ಕಳಚಿ ಮರೆಯಾಗುವುದು ಇನಿಯ
About The Author
