ಕಾವ್ಯ ಸಂಗಾತಿ
ಸಾಮ್ಯತೆ
ಅರುಣಾ ನರೇಂದ್ರ
ನಾನೂ ನಿನ್ನ ಹಾಗೇನೇ ಹೋರಾಡುತ್ತೇನೆ
ತಾಯ ಗರ್ಭದೊಳಗಿಂದ
ಮೊಳಕೆಯೊಡೆಯುತ್ತಲೇ
ಹೋರಾಟ ಅನಿವಾರ್ಯ ವೆಂದೇ
ಶಕ್ತಿ ಪಡೆಯುತ್ತೇನೆ
ನನ್ನೊಳಗಿಂದ
ಆಳವಾಗಿ ಬೇರಿಳಿಸಿ
ಗಟ್ಟಿಯಾಗಿ ನಿಲ್ಲಲು |
ಎದೆ ನಡುಗಿಸುವ
ಬೆಂಕಿ ಬಿರುಗಾಳಿಗಿಂತಲೂ
ಹೆಚ್ಚು ಭಯ ಪಡುತ್ತೇನೆ
ಮುರಿಯುವ ಚಿವುಟುವ ಕೈಗಳಿಗೆ !
ಆದರದೇ ನನ್ನೊಳಗನ ಶಕ್ತಿ
ನನ್ನ ಮತ್ತೆ ಪುಟಿದೆಬ್ಬಿಸುತ್ತದೆ
ಭಾವನೆಗಳ ಕಳೆದುಕೊಂಡು
ಬೆತ್ತಲಾದಾಗಲೆಲ್ಲ ಕಾಣುತ್ತೇನೆ
ನಿನ್ನದೇ ಅಸ್ತಿಪಂಜರ
ಎಂತಹ ಸಾಮ್ಯತೆ !
ಮೈನವಿರೇಳಿಸುವ
ಕನಸುಗಳ ಚಿಗುರಿಸುವ
ಬದುಕಿಗೆ ಬಣ್ಣವೇರುವ
ಘಳಿಗೆಗಾಗಿ ಕಾಯುತ್ತೇನೆ |
ಬದುಕು ಭಾರವ ಹೊತ್ತು
ಬೀಗುತ್ತೇನೆ ತೂಗುತ್ತೇನೆ
ಹೂವಾಗಿ ಕಾಯಾಗಿ ಹಣ್ಣಾಗಿ
ಮಣ್ಣಲ್ಲಿ ಮತ್ತೆ ಮೊಳಕೆಯಾಗುತ್ತೇನೆ !|
About The Author
