ಕಾವ್ಯ ಸಂಗಾತಿ
ನೋವು ಅಳಿಯಲಿ ನಲಿವು ಅರಳಲಿ
ಅನುರಾಧಾ ಶಿವಪ್ರಕಾಶ್
ಮಾಯದ ನೋವಿಗೆ ಕಾಲವೇ ಮದ್ದು
ನಡೆಯಿರಿ ಹೊಸತನು ಹುಡುಕುತ್ತ
ನೋಯದ ನರಳದ ಜೀವವೇ ಇಲ್ಲ
ಬದುಕುವ ಬೇಸರ ಕಳೆಯುತ್ತ
ವೃಣವನು ಕೆದಕಲು ಹೋಗಲೇ ಬಾರದು
ಯಾತನೆ ಕೊಡುವುದು ಅತಿಹೆಚ್ಚು
ನೊಂದಿಹ ಮನಸಿಗೆ ಸಾಂತ್ವನ ಹೇಳುವ
ಹೃದಯವ ಹರುಷದಿ ನೀ ಮೆಚ್ಚು
ಕಳೆದುದು ಬಾರದು ಎಟುಕದ ಕನಸು
ವಾಸ್ತವ ನಡೆಯನು ಅರಿಯೋಣ
ಹರಿಯುವ ನದಿಗೂ ತಡೆಯಿದೆ ಎಂಬುದ
ಮರೆಯದೆ ದಿನವೂ ನೆನೆಯೋಣ
ಅಳಿಯಲಿ ನೋವು ಅರಳಲಿ ನಲಿವು
ತೋಷದ ಗಂಧವು ಪಸರಿಸಲಿ
ಎದೆಎದೆಯಲ್ಲಿ ನಗುವಿನ ಚಿಲುಮೆಯು
ಪ್ರೀತಿ ಪ್ರೇಮವ ಹರಡಿಸಲಿ
About The Author
