ಕವಿತೆ
ನೀನು
ಸಂತೆಬೆನ್ನೂರು ಫೈಜ್ನಟ್ರಾಜ್
೧
ನೀನು ಎದುರಿರಬೇಕಿತ್ತು
ಕಪಾಳ ನೆನೆಯುತ್ತಿರಲಿಲ್ಲ ಇಷ್ಟು
ಮನಸಾರೆ ನಕ್ಕು ಯಾವ ಕಾಲವೋ!
೨
ಬರಿ ಇದ್ದರೆ ಸಾಕಿತ್ತು ನೀನು
ಕಣ್ಣ ಸನ್ನೆಯಲ್ಲೇ ಆ ಮಾತು ಎದೆಗಿಳಿದು
ನಾನು ಇನ್ನಷ್ಟು ಮನುಷ್ಯನಾಗುತ್ತಿದ್ದೆ!
೩
ನೀನಿಲ್ಲ ಅಂತ ಅನ್ನಿಸಿಲ್ಲ
ನಾನಿದ್ದೇನಲ್ಲಾ….ಜೀವಂತ
ಅಂದರೆ ನೀ ಎದೆಗೂಡಲ್ಲಿ ಬಂಧಿ?
೪
ನೀ ನೆಟ್ಟ ಪ್ರೀತಿ ಬಳ್ಳಿ ಒಣಗಲು
ಬಿಡಲಾರೆ ವರ್ಗಾವಣೆ ಮಾಡುತ್ತಾ ಹೋಗಲು
ಕಲಿಯಬೇಕಿದೆ ಒಲವ ನಿನ್ನಂತೆ!
೫
ಅಪ್ಪ ಹೋದರೆಂದು ನೀನೂ ಎದ್ದು ಹಿಂದೆಯೇ ಹೋದೆ
ನಾವೆಂಬುದು ಏನಿದ್ದರೂ ಖಾಲಿ ….. ನೀನು ಎದೆ ಮರದ ಟೊಂಗೆಯ ಒಂಟಿಸ್ವರದ ಕೋಗಿಲೆ…. ಅಮ್ಮ!!!
*************************
About The Author
