ಗಜಲ್
ನಯನ . ಜಿ . ಎಸ್
ಮಂದ ಮಾರುತದ ತಂಪು ಸ್ಪರ್ಶಿಸುತಿರಲು ವಧುವಾದಳು ವಸುಧೆ
ಹನಿ ಇಬ್ಬನಿಗಳು ಇಳೆಯ ಬಳಸಿ ಶೃಂಗರಿಸಿರಲು ವಧುವಾದಳು ವಸುಧೆ !
ಕಾರ್ಮೋಡಗಳು ಘರ್ಜಿಸಿ ಕಾಳಗವ ಗೈಯುತಿದೆ ನಭದ ರಂಗದಲಿ
ಮಿಂಚುಗಳ ಸಲ್ಲಾಪ ನಭದಲಿ ಮೇಳೈಸುತಿರಲು ವಧುವಾದಳು ವಸುಧೆ !
ಹಸಿರು ಹಾಸಿನ ಮಡಿಲೊಳು ಸಾಗಿದೆ ಇಬ್ಬನಿಗಳ ವಯ್ಯಾರದ ನರ್ತನ
ಸುಮಗಳ ಕಂಪು ಸೌಗಂಧವಾಗಿ ಪಸರಿಸುತಿರಲು ವಧುವಾದಳು ವಸುಧೆ !
ಜೀರುಂಡೆಗಳ ಗುನುಗುವಿಕೆಯ ಮೆಲು ದನಿಯ ಸಂಭಾಷಣೆಯ ಹಿತದೂಟ
ಭಾವಗಳು ಮೇಳೈಸಿ ನವ್ಯತನವು ಮೂಡುತಿರಲು ವಧುವಾದಳು ವಸುಧೆ !
‘ನಯನ’ ಗಳಲಿ ಹೊಸತನವ ಬಿತ್ತುತ ಮೆರೆದಿಹ ವರುಣ ಈ ಕ್ಷಣಗಳಲಿ
ಸಂಜೆಯ ತಂಗಾಳಿ ನಯವಾಗಿ ಆವರಿಸಿರಲು ವಧುವಾದಳು ವಸುಧೆ !!
********************
About The Author
