ಕವಿತೆ

ಕರುಣಾಳು ಬಾ ಬೆಳಕೆ

ಡಾ. ಗುರುಸಿದ್ಧಯ್ಯಾ ಸ್ವಾಮಿ

ಸಿರಿಯ ಪಂಜರವ ಹರಿದೊಗೆದು
ಸುಖದ ಮೂಲವ ಹುಡುಕುತ
ಬೋಧಿ ವೃಕ್ಷದಡಿ ತಪವಗೈದು
ದಿವ್ಯ ಜ್ಞಾನವನು ಪಡೆದ ಬುದ್ಧ

ಅಳುವವರ ಕಂಬನಿಯೊರೆಸಲು
ವರ್ಗ ವರ್ಣ ಲಿಂಗ ಭೇದಗಳಳಿಸಲು
ಗುಡಿಸಲೊಳಿರುವವರ ಹುಡುಕುತ
ನಡೆದ ಕರುಣಾಮೂರ್ತಿ ಬುದ್ಧ

ಕೊಲ್ಲಲಿಲ್ಲ ನೀನು ಪಾಪಿಗಳನು
ದ್ವೇಷಿಸಲಿಲ್ಲ ನೀನು ಕೋಪಿಗಳನು
ಕಿತ್ತೊಗೆದೆ ನೀನು ಪಾಪಿಗಳ
ಮನದಾಳದ ಕೊಳೆತ ಕಸವನು

ದುಃಖದ ಮೂಲ ಆಸೆಯ ಬಿಡಿಸಿ
ಶುದ್ಧಾಚರಣೆಯ ದೀಕ್ಷೆಯ ನೀಡಿ
ಜ್ಞಾನಾರ್ಥಿಗಳಿಗೆ ಜ್ಞಾನ ದಾಸೋಹ
ಆರಂಭಿಸಿದ ವಿಶ್ವಗುರು ಬುದ್ಧ

ಜ್ಞಾನದ ಸುದೀಪ ಹೊತ್ತಿಸಿ
ಅಜ್ಞಾನದ ತಮವ ಓಡಿಸಿದ
ಕರುಣಾಳು ಬೆಳಕು ಬುದ್ಧ
ಮತ್ತೊಮ್ಮೆ ಅವತರಿಸಿ ಬಾ

*********************

About The Author