ಕವಿತೆ
ಅಕ್ವೇರಿಯಮ್ ಮತ್ತು ಚಿತ್ರ
ವಿಶ್ವನಾಥ ಎನ್. ನೇರಳಕಟ್ಟೆ
ತೇಲುತ್ತಿರುವ ನೀರಿನಲ್ಲಿ
ಈಜಾಡುತ್ತಿರುವ ಮೀನಿನ
ಚಿತ್ರ ಬಿಡಿಸಿದ ಕಲಾವಿದನೊಬ್ಬ
ಎದೆ ತಟ್ಟಿಕೊಂಡ ಹೆಮ್ಮೆಯಿಂದ
ದಿಟ್ಟಿಸುತ್ತಾ ಎದುರಿಗಿದ್ದ ಅಕ್ವೇರಿಯಮ್ ಮೀನು
ಸಂತಸದಿಂದ ಹೇಳಿಕೊಂಡ-
‘ಇದೇ ಅದು, ಅದೇ ಇದು,
ವ್ಯತ್ಯಾಸವಿಲ್ಲ ಒಂಚೂರು’
ಸಂತೃಪ್ತಿಯಿಂದ ಊರೆಲ್ಲಾ ಸುತ್ತಾಡಿ
ಮನೆಗೆ ಬಂದವನಿಗೆ ಅಚ್ಚರಿ
ಈಗ ಮೀನಿಲ್ಲ ಅಕ್ವೇರಿಯಮ್ನಲ್ಲಿ
ಬಂದು ಕುಳಿತಿದೆ ಅದು ಅವನ ಚಿತ್ರದೊಳಗೆ
ವಿಚಾರಿಸಿದಾಗ ಮೀನು ಹೇಳಿದ್ದು ಇಷ್ಟು-
‘ಅಕ್ವೇರಿಯಮ್ಗಿಂತ ನಿನ್ನ ಚಿತ್ರವೇ ಹಿತವಾಗಿದೆ
ಏಕೆಂದರೆ, ಇದರಲ್ಲಿ ಕಲಾತ್ಮಕತೆಯಿದೆ’
*****************
About The Author
