ಗಜಲ್
ಜ್ಯೋತಿ ಹೊಸಕೋಟೆ
ನೋವುಗಳಿಂದ ಬದುಕಲು ಆಗುತ್ತಿಲ್ಲ ಸಾಕಿ
ಜವಾಬ್ದಾರಿಗಳು ಸಾಯಲು ಬಿಡುತ್ತಿಲ್ಲ ಸಾಕಿ
ಮನೆಯಾದರೇನು ಮನಸ್ಸಾದರೇನು ಗೌರವ ಇಲ್ಲದ ಮೇಲೆ
ಬೆಲೆ ಕೊಡದ ಜಾಗದಲ್ಲಿ ನಿಲ್ಲಲಾಗುತ್ತಿಲ್ಲ ಸಾಕಿ
ಮಾತಲ್ಲಿ ಹೇಳಲಾಗದಂತಾ ಅಂತರಾಳದ ಪ್ರೀತಿ
ಹೃದಯ ಕೊಟ್ಟವರಿಗೆ ಏಕೆ ತಿಳಿಯುತ್ತಿಲ್ಲ ಸಾಕಿ
ಸತ್ತ ಹೆಣಕ್ಕೆ ಮದುಮಗಳಂತೆ ಶೃಂಗಾರ ಮಾಡಿದಂತೆ
ನೆಲ ಕಚ್ಚಿದ ಸಂಬಂಧ ಉಳಿಸಲಾಗುತ್ತಿಲ್ಲ ಸಾಕಿ
“ಜ್ಯೋತಿ” ಎಷ್ಟು ಪ್ರಕಾಶಮಾನವಾಗಿ ಪ್ರಜ್ವಲಿಸಿದರೇನು
ತನ್ನವರೆಂದು ಭಾವಿಸಿದವರಿಗೆ ಬೆಳಕಿನ ಮೌಲ್ಯ ಅರಿವಾಗುತ್ತಿಲ್ಲ ಸಾಕಿ
**********************************************************
About The Author
