ನಮ್ಮೂರ ಮಣ್ಣಿನಲಿ
ವಿನುತಾ ಹಂಚಿನಮನಿ
ನಮ್ಮೂರ ಬೀಸು ಗಾಳಿಯಲಿ
ಮಾಸದ ಸಂಸ್ಕೃತಿಯ ಸುಗಂಧ
ನನ್ನ ಉಸಿರ ಪರಿಮಳದಲಿ
ಇಂದಿಗೂ ಸೂಸತಾವ ಘಮಘಮ
ನಮ್ಮೂರ ಕಾಡ ಹಾದಿಯಲಿ
ನಾ ಮೂಡಿಸಿದ ಹೆಜ್ಜೆ ಗುರುತು
ನಡೆದ ದಾರಿಯ ತೋರಿಸುತಲಿ
ಇಂದಿಗೂ ಬೆನ್ಹತ್ತತಾವ ಎಡಬಲ
ನಮ್ಮೂರ ಕೆರೆಯ ನೀರಿನಲಿ
ನಾ ಒಗೆದ ಕಲ್ಲು ಹರಳು
ಅಲೆಗಳ ಮಾಲೆ ಹೆಣೆಯುತಲಿ
ಇಂದಿಗೂ ನಗತಾವ ಕಿಲಕಿಲ
ನಮ್ಮೂರ ನಿಷ್ಠ ಮಣ್ಣಿನಲಿ
ಕಷ್ಟ ಎದುರಿಸುವ ಕೆಚ್ಚು
ಕನಸಿಗೆ ಎಣ್ಣಿ ಹೊಯ್ಯತಲಿ
ಇಂದಿಗೂ ಮಿನಗತಾವ ಮಿಣಮಿಣ
**********
ನಮ್ಮೂರ ಚಿಕ್ಕ ಆಗಸದಲಿ
ಅಕ್ಕರೆಯ ಚೊಕ್ಕ ಚುಕ್ಕೆಗಳು
ಸಕ್ಕರೆಯ ಕಥೆ ಹೇಳುತಲಿ
ಇಂದಿಗೂ ನೀತಿ ಹೇಳತಾವ ಚಕಚಕ
ನಮ್ಮೂರ ಜನರ ಮನಸಿನಲಿ
ಕರುಣೆಯ ಮಹಾಪೂರ
ಸವಿ ನೆನಪುಗಳ ಸುರಿಯುತಲಿ
ಇಂದಿಗೂ ಹರಸತಾವ ಭರಪೂರ
About The Author
ಚೆಂದದ ಸಾಲುಗಳು