ಸಿಗಲಾರದ ಅಳತೆ

ವಸುಂದರಾ ಕದಲೂರು

ನೀನು, ನಿನ್ನ ಕಣ್ಣು ಕೈ ಮನಸ್ಸು
ನಾಲಗೆಗಳಲ್ಲಿ ಅಂದಾಜು ಪಟ್ಟಿ
ಹಿಡಿದು ಅಳೆದೆ ಅಳೆದೆ ಅಳೆದೆ
ಅಳೆಯುತ್ತಲೇ ಇದ್ದೀಯೆ..

ಸರಿ, ಅಳೆದುಕೋ
ಹಾಗೆ ಅಳತೆಗೆ ದಕ್ಕುವುದಾದರೆ

ನೀ ಅಳೆಯುವುದಾದರೂ ಏನನ್ನು!
ಒಂದಷ್ಟು ಅಂದಾಜು ಸಿಗುವ
ಗಾತ್ರ- ಗೋತ್ರ; ಉಬ್ಬುತಗ್ಗು
ಅವಯವ- ಅವ್ವವ್ವಾ !!
ಅಷ್ಟೇ.

ಅಷ್ಟಕ್ಕೇ ನಿನಗೆ
ದಕ್ಕಿಬಿಟ್ಟರೆ, ರೇ… ಅರೇ
ಹೋಗು, ಅಳೆದುಕೋ

ನಿನ್ನಾ ಅಳತೆಗೋಲು ಅಂದಾಜು
ಶತಮಾನ ಹಳತು ಅದರ ಗೋಲು.
ಮಾಡಿಕೊಂಡು ಬಂದದ್ದು ಬರೀ
ರೋಲುಕಾಲು. ಅಳೆದೂ ಸುರಿದೂ;
ಸುರಿದೂ ಅಳೆದೂ ಸರಕು ಎಂದೋ
ಬರಿದಾದ ಒಂದು ಗುಜರಿ ಮಾಲು.

ಅಕೋ.., ಅಳೆದು ಕೋ
ನೀನು ಅಳೆದು ಕೋ..
ಖೋ.. ಖೋ..

ಹೋಗು ನೀ ಅತ್ತ, ನೀ ಸದಾ
ಅತ್ತತ್ತ. ನಿನಗೆ ಈ ಅಳತೆ ಎಂಬುದು
ಒಂದು ನಿಮಿತ್ತ.

ಅಳತೆಯಿಂದ ಅವಳನು ಯಾರೂ
ಗಿಟ್ಟಿಸಿಕೊಳಲಾಗದ್ದು ಎಂದೆಂದಿಗೂ
ನಿಶ್ಚಿತ. ತಿಳಿ ಅಳತೆಗೆ ನಿಲುಕದ್ದು ಅಪಾರ
ಅನೂಹ್ಯ ಅದೋ ಅವಳ ಚಿತ್ತ.

******

About The Author

admin

See author's posts