ಕುದಿವೆಸರ ಅಗುಳಾಗಬೇಕು

ಕವಿತೆ

ಪ್ರೇಮಾ ಟಿ ಎಮ್ ಆರ್

ತನ್ನ ಹೀಗಿಟ್ಟವರನ್ನೆಲ್ಲ
ಶಾಪ ಹಾಕಬೇಕೆಂದುಕೊಂಡಿದ್ದು
ಅದೆಷ್ಟುಬಾರಿಯೋ
ತನಗಿಷ್ಟಬಂದಂತೆ
ಇರಬಹುದಾಗಿದ್ದರೂ
ಅವರಿಟ್ಟ ಪಾತ್ರೆಯೊಳಗೇ
ತುಂಬಿಕೊಂಡಂತೆ
ಬದುಕಿದ್ದು ತನ್ನದೂ
ತಪ್ಪಲ್ಲವಾ?
ಮತ್ತೆ ಈ ಮನೆ
ಅಪ್ಪ ಅಮ್ಮ ಅತ್ತೆಮಾವ
ಈ ಮಗಳ ಅಪ್ಪ
ಎಲ್ಲರೂ ತನ್ನವರಲ್ಲವೇ
ಎಂದುಕೊಳ್ಳುತ್ತಲೇ
ಅವಳು ಅವಳಂತಿರದೇ
ಅಮ್ಮನಂತೆ ಅಕ್ಕನಂತೆ
ಬದುಕ ಬದುಕುತ್ತಲೇ
ಇದ್ದಾಳೆ

ಎಗರಿಬೀಳಬೇಕಾದಲ್ಲೆಲ್ಲ
ತಣ್ಣೆ ಅಂಬಲಿಯಂತೆ
ಹಳ್ಳೆಣ್ಣೆಯಂತೆ
ಹಂದಾಡುತ್ತಾಳೆ ಮಂದಮಂದವಾಗಿ
ಮನೆಮುಂದೆ ಬಿದ್ದುಕೊಂಡ
ಪೆದ್ದಮುಂಡೆಯಂಥ
ಕಾಲ್ದಾರಿಯೇ ತಾನೆಂದುಕೊಂಡಿದ್ದು
ಅದೆಷ್ಟು ಬಾರಿಯೋ
ಉಗುಳಿ ಉಚ್ಚೆ ಹೊಯ್ದರೂ
ಹೊದ್ದು ಮಲಗಿಕೊಂಡ ಬೀದಿ

ತಡೆಯಲಾರದೇ ಗುಡಗುಡಿಸಿದ್ದೂ
ಇದೆಯಾದರೂ ಮತ್ತೆ
ಪಶ್ಚಾತ್ತಾಪದ ಉರಿಯೂ
ಅವಳ ಉಡಿಗೇ
ಕುದಿವೆಸರೊಳಗಿನ ಅಗುಳಾಗಿ
ಮುಚ್ಚಳ ಕೊಡವಿ ಉಕ್ಕಬೇಕು
ಸಿಡಿಯಬೇಕು ಬಿಡಿಯಾಗಿ ಹಿಡಿಯಾಗಿ
ಒಟ್ಟಿದ ಒಲೆ ಆರುವ ತನಕ
ಹುದುಗದೇ ಬುದುಗಬೇಕು
ಒಮ್ಮೆಗಾದರೂ ಅಂದುಕೊಳ್ಳುತ್ತಾಳೆ

---