ಪಂದ್ಯ0ಡ ರೇಣುಕಾ ಸೋಮಯ್ಯ ಕವಿತೆ, ನೆನಪಿನ ಬುತ್ತಿ - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಕಾವ್ಯ ಸಂಗಾತಿ

ಪಂದ್ಯ0ಡ ರೇಣುಕಾ ಸೋಮಯ್ಯ

ನೆನಪಿನ ಬುತ್ತಿ

ನೂರರು ನೆನಪಿನ ಬುತ್ತಿಗಳು ಬಿಚ್ಚುತಿವೆ
ಇಂದಿನ ಮಕ್ಕಳ ನೋಡುತಲಿl
ಹಾರುತ ಓಡುತ ಕುಣಿಯುತಲಿದ್ದೆವು ಅಂದು
ಮನದೊಳು ಸಂತಸ ಚಿಮ್ಮುತಲಿll೧ll

ಇರಲಿಲ್ಲವೆ ಅಂದು ಮೊಬೈಲು ಕೈಯ್ಯಲಿ
ಇದ್ದುದು ಚಿಲುಕಿ-ಬುಗುರಿ ಲಗ್ಗೋರಿ l
ಮರಕೋತಿ ಆಟದಿ ಸಿಗುತಿದ್ದ ಸಂತಸವ
ಇಂದು ಎಲ್ಲಿ ಹುಡುಕಲಿl೨l

ಮಾವು ಕಿತ್ತಳೆ ಹಣ್ಣನು ಕೀಳುತ
ತಿನ್ನುತಲಿದ್ದೆವು ಒ0ದಾಗಿl
ಕಾವಲುಗಾರನ ಕಣ್ಣನು ತಪ್ಪಿಸಿ
ಓಡುತಲಿದ್ದೆವು ಬಿರುಸಾಗಿll೩ll

ಕೆಸರುಗದ್ದೆಯ ಮೇಲೆ
ಏಳು-ಬೀಳುತಲಿದ್ದೆವು
ಬಿತ್ತನೆ ಮಾಡುವ
ಸಮಯದಲ್ಲಿl
ಹಸಿವಿನ ಚಿಂತೆಯು ಸುಳಿಯಲೇ ಇಲ್ಲ
ತು0ಟಾಟವಾಡುವ ಭರ ದಲ್ಲಿll೪ll