ಕಾವ್ಯ ಸಂಗಾತಿ
ಕಾವ್ಯ ಸುಧೆ. ( ರೇಖಾ )ಕವಿತೆ-
‘ಎತ್ತಣ ಮಾಮರ ಎತ್ತಣ ಕೋಗಿಲೆ’
ಎತ್ತಣದ ಮಾಮರ ಮತ್ತೆಲ್ಲಿಯದೋ ಕೋಗಿಲೆ
ಮಾಮರ ಕೋಗಿಲೆ ನಡುವೆ ಋತುವಿನ ನಂಟು !
ಎಲ್ಲಿಯ ನದಿ ಮತ್ತೆಲ್ಲಿಯೋ ಇರುವ ಕಡಲಿನಲೆ
ಸಾಗುತಲಿ ಒಂದಾಗಿಸಿದ್ದದು ಹಂಬಲದ ನಂಟು !
ಎಲ್ಲಿ ಅಕ್ಕಾ ಎಲ್ಲಿಯ ಚನ್ನಾಮಲ್ಲಿಕಾರ್ಜುನನಲಿ
ಒಂದಾಗಿಸಿದ್ದದು ಭಕ್ತಿಯ ಪರಕಾಷ್ಟೆಯ ನಂಟು !
ದೇಹ ಮನಸನು ಮೀರಿ ಸತ್ ಚಿತ್ ಆನಂದದಲಿ
ಲೀನವಾಗಿಸಿದ್ದದು ಆತ್ಮ ವಿಚಾರದ ಗಂಟು !
ಸಿದ್ದೇಶ್ವರನ ಮುಡಿಯೇರಿ ಎಲ್ಲಿಯದೊ ಸಂಪಿಗೆ
ಹೆಸರನೊಂದಾಗಿಸಿದ್ದು ಹೂವು ನಾರಿನ ನಂಟು !
ಅರಳವುದೆಲ್ಲಿಯೋ ಪರಿಮಳದಿ ಸೂಜು ಮಲ್ಲಿಗೆ
ಮಾದೇಶನ ಶಿರವೇರುವ ಸೋಜಿಗದ ನಂಟು..!
—————————————-
ಕಾವ್ಯ ಸುಧೆ. ( ರೇಖಾ ).
